Аҧсны Аҳәынҭқарра Ахадарахьы акандидат С.Багаҧшь, Гагра араион Маҳадыр ақыҭа даҭааит. Аҳәынҭқарра Ахада ивизит адҳәалан имҩаҧгаз арҽеиратә усурақәа рышьҭахь ақыҭаҿтәи ашколи аклуби раартра.

Иныҟәараҟны Аҳәынҭқарра Ахада ицын Гагра араион ахада Асҭамыр Қецбеи, апарламент адепутатцәеи, Аҳәынҭқарра Ахадарахьы акандидат ихаҭыҧуаҩыс ивагылоу Алеқсандр Анқәаби.
 

Ақыҭауаа Аҳәынҭқарра Ахада иҧылеит ижәтәӡатәиу аерманцәа рҵас ала ачеи аџьыкеи рнапы иқәыргылан. А наҩс Аҳәынҭқарра Ахада изыҟарҵаз агәрагарала,  иааиртит аклуб. “Уажәшьҭа ҳхәыҷқәеи ҳҿари ирымоуп иахьеизаша, аамҭа ахьырхыргаша аҭыҧ, аконцертқәа ахьымҩаҧыргаша, ҳара – урҭ рҭаацәа – ҳусура ашьҭахь ҳаҧсы ахьаҳшьаша”, - ҳәа азгәарҭон ашколтә ансамбль иалахәу аҵаҩцәа рҭаацәа.

Аклуб иацәыхарамкәа иҟоуп ашкол, уаҟагьы имҩаҧгоуп арҽеиратә усурақәа – иҧсахыуп аҧенџьырқәа, адашьма, ашәқәа. Ахыб аҧсахра шаҭахыу  инаҵшьны иазгәеиҭеит Аҳәынҭқарра Ахадарахьы акандидат ихаҭыҧуаҩ Алеқсандр Анқәаб.

“Ҳара ҳзын ныҳәа дууп араҟа ҳҳәынҭқарра Ахада ибара”, - азгәарҭон ақыҭауаа. Аерман қыҭа Маҳадыр  574 – ҭӡы ыҟоуп, уаҟа инхоит 2 нызқьҩыуаак. Урҭ рҟынтә 250-ҩыуаак аурыси аерман школқәеи ирҵаҩцәоуп. Уаанӡа аиҳабыра аҵаҩцәа рырманшәаларазы ирзылырҩаахьан автобус.

Ақыҭауаа зегьы рыхьӡала дықәгылеит Маҳадыр ақыҭа ахада Георгии Хорозиан. “Аҵыхәтәантәи ашықәсқәа рзы ақыҭауаа рыҧсҭазаараҿы аиҭакра бзиақәа ҟалеит. Уи ашколи аклуби рырҽеира мацара акәым, - иазгәеиҭеит уи. – Ҳара ҭабуп ҳәа раҳҳоит ареспублика анапхгара иҳарҭо ацхырааразы.

Хорозиан иажәақәа рыла, “Иахьа Маҳадыр аус руеит адәқьанқәа, ачаӡырҭа, арҽеиратә усурақәа мҩаҧгоуп аӡыеизакырҭаҿы, ишьҭаҵоуп аӡымҩангага 5 км иахьаҵанакуа”.

Хорозиан еиҭеиҳәеит ақыҭанхамҩаҿ аихьӡарақәа ртәы. “Ақыҭаҿы иҟоуп 170 инареиҳаны ауҭраҭыхааӡарҭа рҧхагақәа. Сынтәа 150 тонна инарзынаҧшуа ауҭраҭых Гагратәи аџьармыкьеи аҧсшьарҭа ҭыҧқәеи рахь иаҳҭиит. Ақыҭаҿы 170 хы инарзынаҧшуа арахә ыҟоуп. Аџьармыкьахь инаҳгеит ахштә аалыҵқәа 15 тоннеи, 25 тонна акәаци”.

Маҳадыр ақыҭауаа аҳәынҭқарра Ахада ирҭон азҵаарақәа, иара убас иахашшаауан иаҧсыуам ашколқәа рзы аҧсуа бызшәеи алитературеи рзы арҵага шәҟәқәеи арҵаҩцәеи разымхара; агәаҭарҭа аушьҭырҭатә пункт “Ҧсоу” аҟны аҭагылазаашьа. Уаҟа еиуеиҧшым амаҵзурақәа ақыҭауаа “шыцәдырҳәуа”; ақыҭаҿы амедпункт аҟамзаара; ирҳәеит ирымазарц шырҭахыу аҭыҧантәи афымцатә ҳа; иҭырҵаауан агазмҩангага цәаҳәақәа рышьҭаҵара аҭагылазаашьа.

Багаҧшь хаз ҷыдала дырзааҭгылон апроблемақәа зегьы. “Амедицинатә уада еиқәыршәахоит иаарласны, араҟа амедицинатә ҵара змоу аҳәса злаҟоу ала”, - иҳәеит Багаҧшь.

Ишьҭыхын, иара убас аҟазара ашкол азҵаара, аибашьра ашьҭахь уи ахыбрахь ииаган амилициа. Аурыс бызшәа арҵаҩы лажәақәа рыла, иҟоуп аҧышәа змоу аспециалистцәа ашкол аҟны аус зуша. Багаҧшь иақәиргәыҕит, урҭ даҽа хыбрак ахь ииаганы, уаҟа аҟазара ашкол шыҟало ала.

Убри аан иқәгылоз зегьы иазгәарҭон ареспублика аҧсҭазаараҟны иҟалаз аихьӡарақәа – урҭ зегьы ираҧхьагылоуп Аҧсны ахьыҧшымра азхаҵара.

“Илашәу, мамзаргьы избарц зҭахым роуп иҟоу аиҭакрақәа збарц зҭахым. Иҟаҵоу маҷым. Аха ирацәоуп иҟаҵатәугьы. Ираҳҭап, хә-шықәса раахыс имтәа-имгыла аџьа збаз акоманда аус руртә еиҧш аҭагылазаашьа”, - иҳәеит Маҳадыр ақыҭан инхоз Вагаршак Косиан.

Уи даҧхьеит Аҧсны Аҳәынҭқарра Ахадарахьы акандидат С.Багаҧшь адгылара ширҭо азы аерманцәа реилазаара Ахеилак иҟанаҵаз ааҧхьара.

Сергеи Багаҧшь ақыҭауаа ҭабуп ҳәа реиҳәеит изыҟарҵо агәрагаразы, насгьы иазгәеиҭеит алхратә компаниа шхациркыз ари араионахь ивизит ала.

21.11.2009  Аофициалтә Саит Аҧсны Аҳәынҭқарра Ахада

Иахьа иазгәарҭоит Аҧсны Аҳәынҭшәарҭадаратә Маҵзура аҳәаахьчаратә отриад аҧҵоижьҭеи 17 шықәса аҵра.

Ареспублика Аҧсны Аҳәынҭқарратә шәарҭадаратә Маҵзура аҳәаахьчаратә отриад аиҳабы Зураб Марганиа “Аҧсныпресс” ахь адырра злаҟаиҵаз ала, иахьа Аҟәа аҳәаахьчаратә отриад атерриториаҟны иазгәарҭоит “Архәҭа амш”.

“Иазгәаҭоуп еиуеиҧшым аныҳәатә программа амҩаҧгара: Аофицерцәа рыбжьара аицлабрақәа рымҩаҧгара, аҳәаахьчаҩцәа рықәгыларақәеи, аруаа злахәу аестрадатә концерти”, - иҳәеит зураб Марганиа. Аиааира згаз ирыҭахоит аҳамҭақәа.

Аҧсуа ҳәаахьчаҩцәа рымшныҳәа азгәаҭара иалахәхоит ареспублика Аҧсны Аҳәынҭқарратә Шәарҭадаратә Маҵзура ахантәаҩы ихаҭыҧуаҩ Нугзар Самсониа, Аҧсны иҟоу Урыстәыла Афедерациа Ашәарҭадаратә маҵзура аҳәаахьчаратә усбарҭа ахаҭарнакцәеи.

20.11.2009  Аофициалтә Саит Аҧсны Аҳәынҭқарра Ахада

Аҧсны Аҳәынҭқарра Ахада С.Багаҧшь абҵара 19 рзы идикылеит Урыстәыла Афедерациа Аҳәынҭдума адепутат, афонд “Москва-Аҧсны-Урыстәыла” ахантәаҩы Константин Затулини, Урыстәыла атеннис Афедерациа апрезидент Шамиль Тарпишьеви. Абри азы адырра ҟанаҵеит Аҧсуа телехәаҧшра.

Аиҧылараҿы ирылацәажәеит Аҧсны атерриториаҟны аспортбазақәа реиҭашьақәыргылара азҵаатәқәа.

Шамиль Тарпишьев ишазгәеиҭаз ала, адунеи аҟны ирацәам атәылақәа, атеннистә хәмарра Аҧсны еиҧш ақәра рацәа ахьамоу. Иазгәаҭатәуп, Аҧсны раҧхьатәи атеннистә кортқәа ргылан Гагра 1903 шықәса рзы апринц Ольденбургскии ихаан.

20.11.2009  Аофициалтә Саит Аҧсны Аҳәынҭқарра Ахада

Перу Амилаҭтә аопозициатә партиа Перуантәи Аконгресс ахь ажәалагала ҟанаҵеит Аҧсни Аахыҵ Уаҧстәылеи рхьыҧшымра азхаҵаразы. Апартиа агәра агоит, арҭ Кавказтәи ареспубликақәа рхьыҧшымра азхаҵаразы мап рыцәкразы, Аконгресс мзыз ҳәа акагьы шамам ала,  ҳәа адырра ҟаиҵеит апартиа алидер Олианта Умала.

“Перу – Косово ахьыҧшымра официалла иазхазҵаз атәылақәа ируакыуп, убриинадҳәаланы, ҳара Аҧсни Аахыҵ Уаҧстәылеи иҿыцыу республикақәак раҳасабала официалла разхаҵара иаҧсоуп ҳәа азаҳаҧхьаӡоит. Ҳара амчра анагӡаратә усбарҭахь аҳәара ҟаҳҵеит официалла арҭ аҩ-республикак разхаҵаразы”, - иҳәеит Умала.

Уи иазгәеиҭеит, иҳаҩсыз амчыбжь азы Аконгресс ахь ишнагаз ари ажәалагала, уи адагьы Перу Амилаҭтә партиа имҩаҧнагоит атәыла еиуеиҧшым аполитикатә мчрақәеи, апарламенттә гәыҧқәеи рыҟны аиҿцәажәарақәа ари ажәалагала иадгыларазы.

“Сақәгәыҕуеит,  арҭ Кавказтәи ареспубликақәа разхаҵаразы аӡбара адкылара шаҭахыу Аконгресс агәра аҳаргап ҳәа... Сара ҧынгыла ҳәа акагьы збом арҭ аҩ-республикак рхьыҧшымра азхарымҵартә еиҧш”,- иҳәеит Умала.

19.11.2009  Аофициалтә Саит Аҧсны Аҳәынҭқарра Ахада

 Аҧсны Адәныҟатәи Аусқәа рминистр С.Шамба иазиҧхьаӡоит, Аҧсны ахьыҧшымра азхаҵара азҵаара Белоруссиа ус иаармарианы иаӡбом ҳәа

Аҧсны Адәныҟатәи Аусқәа рминистр С.Шамба иазиҧхьаӡоит, Аҧсны ахьыҧшымра азхаҵара азҵаара Белоруссиа ус иаармарианы иаӡбом ҳәа. “Белоруссиа аделегациа араҟа иахьыҟоу, уи иаанаго апроцесс хацыркыуп ауп. Белоруссиа ари азҵаара аӡбара иазааигәоуп, уи аҭҵаара нап анаркызар”, - иҳәеит аиҧылара ахыркәшамҭаз Аҧсны Адәныҟатәи аусқәа рминистр С.Шамба.

Шамба иазгәеиҭеит Аҧсны шазҿлымҳау Белоруссиа еиҧш иҟоу аиҩызаратә ҳәынҭқаррақәа рыҟны адипломатиатә еизыҟазаашьақәа рышьақәыргылара.

Адәныҟатәи аусқәа рминистрра Ахада дшақәгәыҕуа иҳәеит ” Аҧсны ахьыҧшымра азҵаара Белоруссиа  ишаӡбо.” “Уи аныҟало аамҭа иаҳнарбоит”, - иҳәеит уи.

18.11.2009  Аофициалтә Саит Аҧсны Аҳәынҭқарра Ахада

Аделегациа аилазаараҟны иҟоуп Белоруссиатәи Амилаҭтә Еизара Чернобыльтәи акатастрофа апроблемақәеи, аекологиеи, аҧсабарахархәареи рзы Апалата ахаҭарнакцәа еснагьтәи ркомиссиа ахантәаҩы Михаил Русыи, амилаҭтә шәарҭадаразы Апалата ахаҭарнакцәа еснагтәи ркомиссиа ахантәаҩы ихаҭыҧуаҩ Анатолии Ванкович, аҳәынҭқарраргылареи азакәанҧҵареи рзы Ареспублика Амлаҭтә Еизара Ахеилак акомиссиа ахантәаҩы Евгении Смирнов.

Белоруссиатәи Апарламентаделегациа бзиала шәаабеит ҳәа раҳәо Нугзар Ашәба иазгәеиҭеит, Белоруссиеи Аҧсни еидызҳәало шырацәоу. Аҧсны Аџьынџьтәылатә еибашьра анцоз амҭазы,аҧсуа арҧарцәа уахь ишцоз ҽыхәышәтәра ҳәа, иара убас иуадаҩыз аибашьраашьҭахьтәи аамҭақәа рзы,аусуразы ицаз шырацоу.

Аҧсны Жәлар Реизара Ахада ҷыдала инаҵшьны иазгәеиҭеит, 90-тәи ашықәсқәа рзы Аҧсны аекономикатә санкциақәа ралагаларазәы СНГ атәылақәа анықәгылоз, Белоруссиа апрезидент адгылара шримҭаз.

Н.Ашәба иажәақәа рыла Аҧсни Белоруссиеи рнапхгаҩцәа еснагь еимадан. “Ҳаиҿцаарақәа еснагь аҧхарра рыҵоуп, ҳаиҧыларақәагьы еиҳа лассы-лассы имҩаҧысуа иалагеит, уи жәаҳәарада аекономикатә зҵаарақәа рыӡбара иацхраауеит”, - иҳәеит Ашәба.

Убри аан уи иазгәеиҭеит, иарбан тәылазаалак иара ахатәы проблемақәеи амилаҭтә интересқәеи шамоу.

“Ҳәарада ибзиан, Урыстәыла ҳхьыҧшымра аназханаҵа инашьҭарххны егьырҭ атәылақәагьы адгылара ҳарҭар, аха ҳара ибзианы еилаҳкаауеит уи иаарласны ишзыҟамло. Ҳара џьаргьы ҳаццакуам, иара убас аӡәгьы дҳарццакуам. Ҳаззықәҧоз ҳхьыҧшымра – наунагӡоуп, жәаҳәарада, ари аамҭа иалагӡан адунеиаҟны аиҭакрақәа акыр ҟалоит. Аокеаннырцәтәи аполитикцәагьы, Аҧсны азхаҵара мап ацәызкуа, урҭгьы мышкымзар-мышкы ҳхьыҧшымра азхарҵоит”, иҳәеит Ашәба.

Уи инаҵшьны иазгәеиҭеит, Аҧсны ибзиан ишеилыркаауа Белоруссиа ҳхьыҧшымра азхаҵара иахьахымыццакуа, иарбан тәылазаалак иамоуп ахатәы позициеи аинтересқәеи.

Н.Ашәба Белоруссиа анапхгареи ажәлари ирзеиҕьеишьеит ақәҿиарақәа. “Аҧсны ажәлари анапхгареи ҳаҭырқәҵара дула изныҟәоит Белоруссиа Апрезидент Алеқсандр Лукашенко итәыла анапхгашьа астиль азы,” – иҳәеит Ашәба.

Белоруссиатәи апарламент аделегациа Аҧсныҟа раара, ари аусура ду алагара иахыҵхырҭоуп ҳәа ахәшьара аиҭеит уи.

Белоруссиатәи Амилаҭтә Еизара Чернобыльтәи акатастрофа апроблемақәеи, аекологиеи, аҧсабарахархәареи рзы Апалата ахаҭарнакцәа еснагьтәи ркомиссиа ахантәаҩы Михаил Русыи иара убас иазгәеиҭеит, аделегациа аҿаҧхьа ишықәгылоу ганрацәалатәи ауснагӡатәқәа.

“Зегь раҧхьа игылан, ҳара иҳагәҭакыуп Аҧснытәи Апарламенти ҳареи аимадарақәа ҳабжьаҵара, иара убас анапынҵа ҳамоуп аиҳабыра рҧылараан ҳҳәынҭқаррақәа рыбжьара еизааигәаӡоу аекономикатә еизыҟазаашьақәа ҳабжьаҵаразы аиҿцәажәарақәа мҩаҧаагарц”, - иазгәеиҭеит Русыи.

Иара иажәақәа рыла, Аҧсны ахьыҧшымра Белоруссиа азхаҵара азҵаара – ауснагӡатә хадақәа ируакыуп.

“Ҳара апарламент ахҧатәи ааҧхьара ҳадепутатцәоуп. Иҳаҩсыз Ааҧхьара аусура ахыркәшамҭазы Аҧсни Аахыҵ Уаҧстәылеи рпарламентқәа ааҧхьарақәа нарышьҭит арҭ аҩ-республикак рхьыҧшымра азхаҵара азҵаара ахәаҧшразы, - иҳәеит Белоруссиатәи апарламентарии.

Иара иажәақәа рыла, Белоруссиатәи Апарламент ахҧатәи ааҧхьара – ҩ-Палатакны ишоуп. “Апарламент ахь ҿыц инеиит 174-ҩыуаак адепутатцәа, урҭ зегьы жәаҳәарада ргәаанагарақәа еиҧшым. Убри азын, Аҧсни Аахыҵ Уаҧстәылеи рхьыҧшымра азҵаара ахәаҧшразы, Апалата ахаҭарнакцәеи Ареспублика Ахеилаки ирыдыркылаз аӡбарала иаҧҵоуп аҭагылазаашьа хәҭа-хәҭала аҵаразы х-гәыҧк.

Иара иажәақәа рыла, егьырҭ агәыҧқәа аус руеит аахыҵ Уаҧстәылеи Қырҭтәылеи рыҟны ганкымацаралатәи азнеишьазы ахарадҵарақәеи аҽыҧныҳәақәеи ҟамларазы. “Ҳара аҭагылазаашьа зегьы хәҭа-хәҭала иаадыруазароуп, - иазгәеиҭеит Русыи. Агәаанагара сымоуп, ҩымштәи ҳусура иалагӡаны, аҭагылазаашьа ҭаҳҵаап ҳәа.”

Белоруссиатәи апарламентарии Аҧснытәи иколлегацәа агәра диргеит, араҟа ирбаз ираҳаз Белоруссиа ажәлари анапхгареи ишыддрҳауа ала. Иара иажәақәа рыла, Апарламент аделегациа араҟа иҟоуп апрезидент инапынҵала. “Ҳара ҳазҿлымҳауп иара убас ҳҳәынҭқаррақәа аимадарақәа рыбжьаҵара. Белоруссиа Апарламент аҟны 143 ҳәынҭқарра рпарламентқәа аус рыцуразы еиуеиҧшым агәыҧқәа аус руеит, ус еиҧш агәыҧ, ҳпарламентқәа аусеицура рыбжьаҵаразы аусура хацнаркырц алшоит”, - иҳәеит Русыи.

Иара иажәақәа рыла, Аҧсни Белоруссиеи еидызкыло рацәоуп, зегь раҧхьа иргыланы “аҩ-республикак еснагь аҧсҭазааразы азин иазықәҧоит”.

Русыи игәаанагарала, “Аҧсҭазаара амҩа ду аныларазы, иҟаҵатәуп раҧхьатәи ашьаҿа”.

“Раҧхьатәи ашьаҿа ҟаҳҵоит араҟа, аҭагылазаашьа ҭҵааны – иҳәеит апарламентарии. Араҟа иҳауа аинформациа ҳалхыҩцәеи ҳусбарҭақәа зегь рахьи инагахоит обиективла”.

Аҧсны анапхгара ҭабуп ҳәа реиҳәеит иҟарҵапз адкылара ҧха азы.

18.11.2009  Аофициалтә Саит Аҧсны Аҳәынҭқарра Ахада

Аделегациа аилазаараҟны иҟоуп Белоруссиатәи Амилаҭтә Еизара Чернобыльтәи акатастрофа апроблемақәеи, аекологиеи, аҧсабарахархәареи рзы Апалата ахаҭарнакцәа еснагьтәи ркомиссиа ахантәаҩы Михаил Русыи, амилаҭтә шәарҭадаразы Апалата ахаҭарнакцәа еснагтәи ркомиссиа ахантәаҩы ихаҭыҧуаҩ Анатолии Ванкович, аҳәынҭқарраргылареи азакәанҧҵареи рзы Ареспублика Амлаҭтә Еизара Ахеилак акомиссиа ахантәаҩы Евгении Смирнов.

Белоруссиатәи апарламентарицәа рҧылоит Аҧсны Жәлар Реизара Аиҳабы Н.Ашәбеи адепутатцәеи. Анаҩс, Аминистрцәа Реилазаараҟны имҩаҧысуеит аиҧылара, уи ашьҭахь аделегациа рыдыркылоит Аҧсны Адәныҟатәи Аусқәа рминистр С. Шамбеи, Атәылахьчара Ахада Мираб Кьышьмариеи. Ахәлҧаз Белоруссиатәи адепутатцәа ргәыҧ идикылоит Аҧсны Аҳәынҭқарра Ахада С.Багаҧшь.

Абҵара 19 рзы асацәа аҭаауеит Аҧснытәи Аҳәынҭқарратә унивирситет, иҧылоит Аҧсуа Қьырсиантә Уахәама ахада Виссарион Аҧлиа. Иара убри аҽны ирҭаауеит  Афон Ҿыц аҭыҧ ҧшӡарақәа. Абҵара 20 рзы асасцәа Аҧснынтә ицоит.

18.11.2009  Аофициалтә Саит Аҧсны Аҳәынҭқарра Ахада

 Абҵара 16 рзы Аҧсуа ҳәынҭқарратә телерадиоеилахәыра аҟны иалагеит Аҳәынҭқарра Ахадарахьы акандидатцәа рагитациа

Абҵара 16 рзы Аҧсуа ҳәынҭқарратә телерадиоеилахәыра аҟны иалагеит Аҳәынҭқарра Ахадарахьы акандидатцәа рагитациа. Абҵара 11 рзы Ацентртә алхратә комиссиаҟны имҩаҧгаз аҵәҭаҧсара инақәыршәаны, аефир актәи амчыбжь азы (абҵара 16 инаркны 20-нӡа) Аҳәынҭқарра Ахадарахьы  акандидат Аҧсуа ҳәынҭқарратә телехәаҧшра ишиашоу ицо аефир ала алхыҩцәа рызҵаарақәа рҭакқәа ҟаиҵароуп. Мамзаргьы, уи ахаҭыҧан акандидат ихатәгәаҧхарала, сааҭк рҟынӡа иҟоу агитациатә ҟазшьа змоу аматериал аҳәынҭқарратә телехәҧшрахьы инаигарц илшоит.

Аҳәынҭқарра Ахадарахьы акандидат Заур Арӡынба, имҩаҧгаз аҵәҭаҧсара инақәыршәаны, Аҧсуа телехәаҧшра аефир ала раҧхьа дықәгылар акәын, аха уи иалихит аҩбатәи авариант, ателехәаҧшрала идырбан уи изкыз афильм “Аҧсны азыҧшуп аиҭакрақәа” ҳәа захьӡу афильм. Афильм аҟны дықәгылеит акандидат ихаҭа, ихцәажәеит ицеибашьуаз,  Аҧсуа мшынҕбаныҟәара аҟны аус ицызуа, уаҟа напхгаҩыс аус иуеижьҭеи иҵуеит 15 шықәса, иара убас алхратә штабқәа рхаҭарнакцәеи, аҿартә еиҿкаарақәеи.

“Ҳара аибашьраҟны ҳаиааит, иҳауит ахьыҧшымра, аринахыс аҧхьаҟа ҳҧеиҧшахь шаҟа ашьаҿа иаша ҳзыҟаҵо ауп ихадоу”, - иҳәеит Заур Арӡынба иқәгылараҟны.

Абҵара 16 ашьыжь инаркны, Ацентртә алхратә комиссиа аҟны имҩаҧгаз аҵәҭаҧсара инақәыршәаны, Аҧсуа ҳәынҭқарратә телехәаҧшра аканал ала идәықәҵалахоит 3 минуҭк рынӡа иҟоу Аҳәынҭқарра ахадарахьы акандидатцәа рагитациатә роликқәа.

Ишәгәалаҳаршәоит, Ареспублика Аҧсны Аҳәынҭқарра Ахадарахьы акандидатцәа хәыда-ҧсада 4 сааҭк аефиртә аамҭа шырзоужьу. Аҳәынҭқарра ахадарахьы акандидатцәа, иара убас аефир иаздырхиарц рылшоит3 минуҭк рҟынӡа иҟоу аӡыргаратә роликқәа, урҭ мышк хынтә аефир ахь иҭыжьлахоит. Аӡыргаратә роликқәа акандидатцәа иаздырхиоит рхала, ирзоужьу алхратә фонд аҟынтә.

Иара убас хазхаҭалатәи аканал “Абаза –ТВ” аҟны абҵара 16 рзы официалла алхратә агитациақәа ирылагеит. Актәи аролик изкын, ателеканал аҧҵаҩы, Аҳәынҭқарра Ахадарахьы акандидат Беслан Быҭәба. Ателеканал “ аредакциа “Абаза – ТВ” аусзуҩцәа ражәақәа рыла, акандидатцәа зегьы аефиртә аамҭа, азакәан ишаҳәоу еиҧш еиҟараны ирзоужьхоит.

17.11.2009  Аофициалтә Саит Аҧсны Аҳәынҭқарра Ахада

 Лужкови Багаҧшьи рнапы аҵарҩит ахәҳахәҭра-економикатәи, анаука-техникатәи, агәҳалалра-культуратәи усхкқәа рыҟны аусеицуразы аиқәшаҳаҭра

Аҧсны иааит Москва ақалақь Ахада Иурии Лужков зхадараҿы дыҟоу аиҳабыра рделегациа. Аделегациа аилазаараҟны, Москва амазара-дгьылтә еизыҟазаашьақәа ркомплекс анапхгаҩы Владимир Силкин, аҳҭны-қалақь афатә -ажәтә аалыҵқәа рдепартамент ахада Александр Бабурин, ақалақьргылара адепартамент анапхгаҩы Алеқсандр Косован, аҳҭны-қалақь адәныҟаекономикатә еимадарақәа рдепартамент анапхгаҩы  Георгии Мурадов, Москва Аахыҵ-Мрагылара административтә округ апрефект Владимир Зотов, Урыстәыла аҭагылазаашьа ҷыдақәа рзы аминистрра аҳтны-қалақь Аусбарҭа хада аиҳабы Алеқсандр Ермеев уҳәа убас егьырҭгьы.

Аҟәатәи аҳаирбаҕәазаҟны Москва аиҳабыра дырҧылеит Аҧсны Аҳәынҭқарра Ахада С.Багаҧшь.

И.Лужкови С.Багаҧшьи рнапы аҵарҩит Москвеи Аҧсни реиҳабырақәа рыбжьара ахәҳахәҭра-економикатәи, аҵарадырра-техникатәи, агәҳалалра-культуратәи усхкқәа рыҟны аусеицуразы аиқәшаҳаҭра.

Аҧсны ақыҭанхамҩа аминистр Иурии Акабеи Москва афатә-ажәтә аалыҵқәа рдепартамент ахада Алеқсандр Бабурини рнапы аҵарҩит “Москва афатә-ажәтә аалыҵқәа Рдепартаменти Ареспублика Аҧсны ақыҭанхамҩа аминистрреи афатә - ажәтә аалыҵхкқәа рыҟны аусеицуразы амеморандум”.

Анаҩс Москва ақалақь Ахада Аҧсны Аҳәынҭқарра ахада дицны рхы дырхеит Аҟәа Ахақәиҭра Ашҭахь, уаҟа имҩаҧыситАҧсны азы иааргаз агәҳалалратә еидара официалла рыҭара ацеремониа.

Уи ашьҭахь Москва аделегациа рҭааит  зыргылара иаҿу “Москва аҩни”, Урыстәылатәи аҳәаахьчаҩцәеа ахьгылои, Ешыратәи аспортбазеи.

Москва ақалақь ахада араҟа иҟазаара аофициалтә программа хнаркәшоит Аҧснытәи аҳәынҭқарратә филармониаҟны имҩаҧысраны иҟоу акциа “Урыстәылеи Аҧсни рҿар – пҳьаҟа”.

13.11.2009  Аофициалтә Саит Аҧсны Аҳәынҭқарра Ахада

 Аҧсны Аҳәынҭқарра Ахада С.Багаҧшь 60-шықәсхыҵра идиныҳәалеит еицырдыруа аҵарауаҩ – кавказҭҵааҩ, Британиатәи апрофессор Џьорџь Хиуит

Аҧсны Аҳәынҭқарра Ахада С.Багаҧшь 60-шықәсхыҵра идиныҳәалеит еицырдыруа аҵарауаҩ – кавказҭҵааҩ, Британиатәи апрофессор Џьорџь Хиуит.

Адныҳәаларатә шәҟәаҿы С.Багаҧшь иазгәеиҭеит Аҧсни уи акәльтуреи адунеи аҟны еицырдыруа аҟаҵараҿы Џьорџь Хиуит ироль ду.

Аҭактә шәҟәаҿы Џьорџь Хиуит ҭабуп ҳәа ахиҳәааит Аҳәынҭқарра Ахада изыҟаиҵаз адныҳәаларази, иара убас иџьабаа ахә ҳаракны иахьишьази.

Џь.Хиуит – кавказҭҵааҩуп, Лонднотәи аунивирситет апрофессор, Британиа аҵарадыррақәа ракадемиа алахәыла, Британиа Ду аҟны Ареспублика Аҧсны ҳаҭыр зқәу аконсул, алингвистика апроблемеи, аҭоурыхи ҳаамҭазтәи Кавказ аетнополитикатә ҭагылазаашьеи рзы астатиақәеи, аочеркқәеи, амонографиақәеи жәпакы дравторуп.

12.11.2009  Аофициалтә Саит Аҧсны Аҳәынҭқарра Ахада

Аҧсны Аҳәынҭқарра Ахада С.Багаҧшь имаҵзура аҟынтә ихы дақәиҭитәит аҧыза-аминистр Алеқсандр Анқәаб алхрақәа мҩаҧысуанаҵы.

Абри азы Аусҧҟа инапы аҵаиҩит Аҳәынҭқарра Ахада С.Багаҧшь “Ареспублика Аҧсны Аҳәынҭқарра Ахада иалхрақәа” рзы Аконституциа 10 ахәҭаҷ инақәыршәаны, иара убас А.Анқәаб Аҳәынҭқарра Ахадарахьы акандидат ихаҭыҧуаҩыси дахьықәгылои инарымаданы. Аҧыза-аминистр инапынҵақәа рынагӡара идҵоуп аҧыза-министр актәи ихаҭыҧуаҩ Леонид Лакербаиа.

Ҧхынҷкәын 12 рзы имҩаҧысраны иҟоу Аҳәынҭқарра Ахада иалхрақәа рыҟны Аҳәынҭқарра Ахадарахьы акандидат С.Багаҧшь хаҭыҧуаҩыс дивагылоуп А.Анқәаб.

12.11.2009  Аофициалтә Саит Аҧсны Аҳәынҭқарра Ахада

 Аҳәынҭқарра Ахадарахьы акандидатцәа зегьы Аҳәынҭқарратә телехәаҧшреи арадиои рыҟны хәыда-ҧсада ҧшь-сааҭк аефиртә аамҭа рзоужьхоит

Аҧсны Аҳәынҭқарра Ахадарахьы акандидатцәа зегьы Аҧснытәи Аҳәынҭқарратә телехәаҧшреи арадиои рыҟны хәыда-ҧсада ҧшь-сааҭк аефиртә аамҭа рзоужьхоит. Абри азы адыра ҟарҵеит Ацентртә алхратә комиссиаҟны. “Уи адагьы,  Аҳәынҭқарра Ахадарахьы акандидатцәа рхарџьқәа рыла иазырхиоу, х-минуҭк иҟоу аӡыргаратә роликқәа  Аҧсуа телехәаҧшра аканал ала мышк хынтә идырбалахоит. Аӡыргаратә роликқәа аефир аҟны иҟалоит 20 мыш,” – иҳәеит Баҭал Табаҕәуа.

Актәи амчыбжь азы, абҵара 16 инаркны 20-нӡа – Аҳәынҭқарра Ахадарахьы акандидат азин имоуп сааҭк рҟынӡа зхранометраж ыҟоу афильм Аҧсуа телехәаҧшрахьы анагара.

Абҵара 23 инаркны 27-нӡа – Аҳәынҭқарра Ахадарахьы акандидат азин имоуп зыгәра иго, мамзаргьы даҽа хаҭарнакцәақәак иваргыланы (урҭ хәҩык иреиҳамзароуп), Аҧснытәи Аҳәынҭқарратә телехәаҧшра ишиашоу ицо аефир аҟны сааҭк аамҭа ихы иаирхәарц, мамзаргьы акандидат ихарџьқәа рыла иаҧҵоу , агитациатә ҟазшьа змоу авидеонҵамҭа азырхиара.

Абҵара 30 инаркны ҧхынҷкәын 4 – нӡа – сааҭк аефиртә аамҭа рзоужьхоит Аҧсны Аҳәынҭқарра ахадарахьы акандидатцәа рхаҭыҧуаа, алхыҩцәа рызҵаарақәа рҭаққәа рыҟаҵаразы.

Ҧхынҷкәын 7 инаркны 11-нӡа – аҧсуа телехәаҧшра ишиашоу ицо аефир аҟны алхыҩцәа рызҵаарақәа рҭаққәа ҟарҵоит Аҧсны Аҳәынҭқарра ахадарахьы акандидатцәа.

Ацентртә алхратә комиссиа адырра злаҟанаҵаз ала, авидеонҵамҭа аҧсуа телехәаҧшрахьы инагахароуп аефир ахь аҭыжьразы 5 сааҭк аамҭа шыбжьоу.

10.11.2009  Аофициалтә Саит Аҧсны Аҳәынҭқарра Ахада

Аҧсны аделегациа алахәхоит Кавказ ашәарҭадаразы Женеватәи аицәажәарақәа изаамҭанытәиу рраунд. Аицәажәарақәа мҩаҧысуеит абҵара 11 рзы.

Аҧснытәи аделегациа аилазаара аҟны иҟоуп жәларбжьаратәи азҵаарақәа рзы Аҳәынҭқарра Ахада иабжьагаҩ Виачеслав Чырыкба, атәылахьчара аминистр ихаҭыҧуаҩ Гарри Кәпалба, Адәныҟатәи Аусқәа рминистрра жәларбжьаратәи аҟәша аиҳабы Лана Агрба, Аҧсуа-абаза жәлар Жәларбжьаратәи Рассоциациа анагӡком алахәыла Зеки Қапба.

Лана Агрбеи Гарри Кәпалбеи аус рыулоит агәманитартә зҵаарақәа рзы агәыҧ аҟны, Виачеслав Чырыкбеи Зеки Қапбеи аус рулоит ашәарҭадара азҵаарақәа рзы агәыҧ аҟны.

10.11.2009  Аофициалтә Саит Аҧсны Аҳәынҭқарра Ахада

Аҧсуа спортсменцәа аҧхьахәтә ҭыҧқәа ааныркылеит зых иақәиҭу ақәҧараҿы Урыстәыла зҽаҧсазтәыз азыҟаҵаҩ Л.Г.Кесов игәаларшәаразы Урыстәылазегьтәи атурнир аҟны. Аицлабрақәа мҩаҧысуан Краснодар ақалақь аҟны абҵара 5 инаркны 8-нӡа.

Гәдоуҭатәи аспорттә школ ааӡамҭацәа Гәдиса Гергиеи (35 килог.рҟынӡа), Осман Џьуҕьелиеи (35 килограмм рҟынӡа) иааныркылеит актәи аҭыҧқәа. Ақәҧаҩ Инал Кетиеи (ақ.Гәдоуҭа) 32 килограмм акапантә категориаҟны, Аҟәатәи аспортсмен Саҭбеи Ҭраҧшьи 38 килограмм акапантә категориаҟны иааныркылеит аҩбатәи аҭыҧқәа. Инал Кетиа иара убас ианаршьеит “иреиҕьыу атехниказы” ҳәа аҳамҭа.

Гәдоуҭатәи арҧыс Џьансыхә Бениа 50 килограмм акапантә категориаҟны ахҧатәи аҭыҧ ааникылеит.

Аҧсуа қәҧаҩцәа азыҟарҵон азыҟаҵаҩцәа Асҭамыр Бениа, Манучар Бешир –оглы, Тимур Џьопуа.

Абри азы адырра ҟаиҵеит Манучар Бешир-оглы.

10.11.2009  Аофициалтә Саит Аҧсны Аҳәынҭқарра Ахада

Ацентртә алхратә комиссиаҟны имҩаҧысит Алингвистикатә комиссиа аилатәара. Х-ҩыуаак Аҳәынҭқарра Ахадарахьы акандидатцәа – Беслан Быҭәба, Заур Арӡынба, Виталии Бганба аҧсуа бызшәазы аҧышәара иахыжьын.

Алингвистикатә комиссиа ахантәаҩы Алеқсеи Касланӡиа адырра злаҟаиҵаз ала, рыхҩыуаак акандидатцәа аҧсуа бызшәазы рдыррақәа бзиоуп ҳәа ахә ршьеит акомиссиа алахәцәа.

2004 шықәсазтәи алхрақәа раан, С.Багаҧшьи Р.Ҳаџьымбеи аҧсуа бызшәазы адырра бзиақәа злаадырҧшхьаз ала, акомиссиа иаӡбеит урҭ аҧышәара иахырмыжьразы.

Касланӡиа иажәақәа рыла, урҭ хатәгәаҧхарала акомиссиахь иааны аҧышәара иахысит.

Акандидатцәа зегьы рахь адҵаҟаҵарақәа еиҧшын. Аҧсышәала иҩу атеқст иаҧхьаны еиҭарҳәар акәын. Насгьы, зых иақәиҭу атемала акомиссиа алахәцәа рызҵаарақәа рҭакқәа ҟарҵар акәын.

Алингвистикатә комиссиа ахантәаҩы Касланӡиа игәаанагарала, акандидатцәа зегьы ибзианы Аҳәынҭқарратә бызшәа рдыруеит.

05.11.2009  Аофициалтә Саит Аҧсны Аҳәынҭқарра Ахада

 Алингвистикатә комиссиа ишьақәнаргылоит Аҧсны Аҳәынҭқарра Ахадарахьы акандидатцәа Аҳәынҭқарратә бызшәазы рдыррақәа

Ацентртә алхратә комиссиа еиҿнакаауеит алингвистикатә комиссиа, Аҳәынҭқарра Ахадарахьы акандидатцәа Аҳәынҭқарратә бызшәа ахьынӡардыруа шьақәзыргыло. Уи аилазаара иалоуп хә-ҩыуаак: Алеқсеи Касланӡиа, Баҭал Ҳагәышь, Ева Ҭаниа, Адгәыр Шьынқәба, Фатима Кәарҷелиа. Абри азы адырра ҟаиҵеит Ацентртә алхратә комиссиа ахантәаҩы Баҭал Табаҕәуа. Аҳәынҭқарра Аконституциа инақәыршәаны, Аҧсны Ахада идыруазароуп Аҳәынҭқарратә бызшәа бзианы.

Абҵарамза 2 рзы ихыркәшахеит Аҧсны Аҳәынҭқарра Ахадарахьы акандидатцәа рықәыргыларақәа. Ацентртә алхратә комиссиахь иааган аҧшьгаратә гәыҧқәа рыҟнытә анапы зҵаҩу абҕьыцқәа Заур Арӡынба, Виталии Бганба, Рауль Ҳаџьымба  кандидатцәас рықәргыларазы, иара убас апартиа „Иакыу Аҧсни“ Аҧсны аекономикатә ҿиара апартиеи рсиездқәа рыҟнытә аӡбарақәа. Апартиа „Иакыу Аҧсны“ Аҳәынҭқарра Ахадарахьы кандидатс дықәнаргылеит, иахьазы Аҳәынҭқарра Ахадас иҟоу Сергеи Багаҧшь, Аҧсны аекономикатә ҿиара апартиа – уи ахантәаҩы Беслан Быҭәба.

Акандидатцәа ашәҟәы рҭаҩра хыркәшахоит абҵара 12 рзы. Акандидатцәа агәраргагақәа рнапаҟны ианрырҭалак ашьҭахь, агитациақәа рылагара азин рымоуп.

03.11.2009  Аофициалтә Саит Аҧсны Аҳәынҭқарра Ахада

 Аҧсны Аҳәынҭқарра Ахада С.Багаҧшь агәаҭарҭа-аушьҭырҭатә ҭыҧ „Ҧсоу“ аҭагылазаашьзы аусуҩтә еилатәара мҩаҧигеит

Иахьа, Аҧсны Аҳәынҭқарра Ахада С.Багаҧшь имҩаҧигеит аусуҩтә еилатәара агәаҭарҭа-аушьҭырҭатә ҭыҧ „Ҧсоу“ аҭагылазаашьзы. Аилатәара иалахәын аҧыза-министр Алеқсандр Анқәаб, аҧыза-министр актәи ихаҭыҧуаҩ Леонид Лакербаиа, аекономика аминистр Кристина Озган, аҧсуа-аурыс ҳәааҟны аус зуа  аҳәаахьчаратәи, аҳазалхратәи, акарантинтәи маҵзурақәа рнапхгаҩцәа.

Иҷыдоу аилатәара амҩаҧгара мзызс иаиуит Аҳәынҭқарра Ахада Иусбарҭахь анхацәа рҟынтә иаауа ашәыҟәқәа. Урҭ ахашшаауеит иаадрыхуа ауҭраҭыхи ашәыри аҳәаа ахыгаразы рхарџьқәа шырацәоу.

Аҳәынҭқарра Ахада изыхәҭоу амаҵзурақәа рнапы ианиҵеит аҭагылазаашьа ҭырҵааразы.

Ауаа, иара убас иахашшаауеит Ҧсоунтә иаауа автобусқәа рныҟәара аграфик. Аҳәынҭнаплакы „Аҧсныавтотранс“ анапхгаҩцәа ауааҧсыра рзы иманшәалоу аамҭа азгәаҭаны, аграфик аҧсахрақәа шаларгало азы ажәа рҭиит.

03.11.2009  Аофициалтә Саит Аҧсны Аҳәынҭқарра Ахада

Аҧсны Аҳәынҭқарра Ахада С.Багаҧшь Иусҧҟала, амилаҭтә культура аҿиараҟны илшамҭа  дуқәа рзы, Едуард Агрба ихҵоуп Ареспублика Аҧсны зҽаҧсазтәыз  артист ҳәа ахьыӡ.

03.11.2009  Аофициалтә Саит Аҧсны Аҳәынҭқарра Ахада

 Актиорцәа Геннадии Ҭарбеи, Роман Сабуеи, Сырбеи Сангәлиеи ирыхҵоуп Аҧсны зҽаҧсазтәыз артист ҳәа аҳаҭыртә хьыӡқәа

Атеатртә ҟазара аусхк аҟны рылшамҭақәа рзы Аҧсуа Ҳәынҭқарратә драматә театр актиорцәа Геннадии Ҭарбеи, Роман Сабуеи, Сырбеи Сангәлиеи ирыхҵоуп „Аҧсны зҽаҧсазтәыз артист“ ҳәа аҳаҭыртә хьыӡқәа. Абри азы Аусҧҟа инапы аҵаиҩит Аҧсны Аҳәынҭқарра Ахада Сергеи Багаҧшь.

03.11.2009  Аофициалтә Саит Аҧсны Аҳәынҭқарра Ахада

Аҧсны Адәныҟатәи Аусқәа рминистр С. Шамба дырҧылеит, арҭ амшқәа рзы Аҧсны иааны иҟоу Приднестровиа Молдавиатәи Ареспублика адәныҟатәи аусқәа рминистр Владимир Иастребчаки уи ихаҭыҧуаҩ Сергеи Симоненкои. Аиҧылара далахәын Приднестровиа Молдавиатәи ареспубликаҟны Аҧсны ахаҭарнак Гарри Кәпалба.

Аминистрцәа алацәажәеит Аҧсни Приднестровиа Молдавиатәи ареспубликақәа рҟны аҭагылазаашьеи, иара убас аҩ-республикак рыҿиара аперспективақәеи. Аиҧылараҿы иазааҭгылан Женеватәи аицәажәарақәа ртемеи, Галтәи хә-ганктәи аиҧыларақәеи, Приднестровиа Молдавиатәи ареспубликеи Молдовеи реизыҟазаашьа.

02.11.2009  Аофициалтә Саит Аҧсны Аҳәынҭқарра Ахада