AҦCУAA PЫБЖbbI

                    -------------------- Aҧcнынтәи aжәабжь ҿыцқәа--------------------     Аҧсуа шрифт



 
 Аҟәа имҩаҧгахоит ашықәс ҿыц иазкәу ақалақь арҧшӡаразы аконкәрс

 

Декабр 10 инаркны 25 нӡа Аҟәа имҩаҧгахоит итрадициатәхаз, ашықәс ҿыц иазкәу афасадқәеи ахәаахәҭратә ҩнқәа рхаҿратә ганқәеи рырҧшӡаразы аконкәрс.

 

Аҟәа ақалақь ахада Алиас Лабахәуа ахәаахәҭратә ҩнқәеи, адәқьанқәеи, уҳәа рнапхгаҩцәа ирыдигалоит ашықәс ҿыц иазкәу ақалақь арҧшӡаразы аконкәрс рҽаладырхәырц. Аконкәрс амҩаҧгаразы иаҧҵоуп акомиссиа. Уи ахадара азиуеит Аҟәа ақалақь ахада ихаҭыҧуаҩ Вадим Черқьезиа.

 

Аконкәрс аихшьаалақәа рыҟаҵараан ахшыҩзышьҭра аҭахоит ауадақәа, афасад, ахаҿратә ганқәа рырхиараҿы ашықәс ҿыц акомозициа аҟазарыла азнеишьа.

 

Актәи аҭыҧ аанызкыло ианашьахоит 20 нызықь мааҭ, иара убас аҳаҭыртә грамота; аҩбатәи аҭыҧ - 15 нызықь мааҭи адипломи; ахҧатәи 10 нызықь мааҭ, иара убас аџьшьаратә шәҟәы. Аџьшьаратә шәҟәы иара убас, ирыҭахоит аконкәрс иалахәхо зегьы.

 

30.11.2011  Аҧсныпресс

 

 Сергеи Багаҧшь ихьӡ анаӡаӡатәразы иаҧҵоу аҳәынҭқарратә комиссиа раҧхьаӡатәи аусутә еилатәара мҩаҧнагеит

 

Иахьа имҩаҧысит Аҧсны Ахада Сергеи Багаҧшь ихьӡ анаӡаӡатәразы иаҧҵоу аҳәынҭқарратә комиссиа раҧхьаӡатәи аусутә еилатәара. Аҧсны Ахада ихаҭыҧуаҩ Михаил Логәуа хадара ззиуа акомиссиа алахәылацәа ирылацәажәеит азеиҧштә зҵаатәқәа.

 

Араҟа иӡбан Сергеи Багаҧшь ихьӡ анаӡаӡатәразы иҟаҵаз еиуеиҧшым ажәалагалақәа ауаажәларратәи аполитикатәи апартиақәа алархәны аус рыдулара.

 

Иара убас, иахьа Сергеи Багаҧшь Аҧсны даҧхеижьҭеи шықәсыбжак аҵра инамаданы Аҟәатәи Акафедралтә уахәамаҟны имҩаҧган игәаларшәара иазкыз анцәа иашьапкра.

 

29.11.2011  Аҧсныпресс

 

 Аҟәа иаатит ахҧатәи жәларбжьаратәи археологцәа рконференциа

 

Аҟәа иаатит ахҧатәи жәларбжьаратәи археологцәа рконференциа. Уи азкыуп аҭоурыхҭҵаарадыррақәа рдоктор, академик Георги Шамба игәаларшәара.

 

Аконференциа аиҿкаареи амҩаҧгареи иалахәуп Аҧснытәи аҭҵаарадыррақәа ракадемиа, Д.Гәлиа ихьӡ зху аҧсуа аҭҵааратә институт, аҭоурыхтә-культуратә ҭынха аиқәырхаразы аҳәынҭқарратә усбарҭа, Аҧснытәи Аҳәынҭқарратә музеи, Аҧснытәи Аҳәынҭқарратә университет, Мрагыларатәи ажәларқәа рҟазара аҳәынҭқарратә музеи (Москва), Урыстәыла аҭҵаарадыррақәа ракадемиа иатәу археологиа аинститут (Москва).

 

80 ҩык аҵарауаа аконференциа рҽаладырхәырц Аҧсныҟа иааит Урыстәылантәи, Украинантәи, Франциантәи, Германиантәи. Аҧсны аиҳабыра рыхьӡала аконференциа алахәылацәа бзиала шәаабеит ҳәа реиҳәеит аҧыза-министр Леонид Лакербаиа.

 

Асекциақәа рыла еихшоуп аилатәарақәа рышьҭахь, аконференциа ахыркәшара азгәаҭоуп декабр мза акы азы.

 

29.11.2011  Аҧсныпресс

 

 Ассамблеиа Ааҧхьара

 

ыр иаҧсоу ҳауаажәлар!

 

Аҧсуаа рхеидкылақәа рфедерациа Ассамблеиа алахәцәа!

 

Аҭоурых аамҭа цәгьақәа ирыхҟьаны иахьа ҳажәлар еиҟәшоуп. Ас еиҧш иуадаҩыз алахьынҵа азежәтәи ашәышықәсазы иҳацеиҩыршеит иашьарала иаҳзааигәоу кавказтәи ажәларқәа аубыхцәа, аедыгьқәа, шаҧсыӷаа, ачерқьесцәа, аҟабардақәа. Ҳажәлар рҭоурых аҿы иуадаҩыз ари аамҭа иахьагьы анырра ҳнаҭоит. Аха егьа ус акәзаргьы, ҳазҭагылоу аамҭа иҳаднаҵоит имариам азҵаарақәа рыӡбара.

 

Ажәлар рлахьынҵаҿы иҟалоит убас еиҧш агхақәа рырҽеира аамҭа анааиуа. Иахьа аҧсҭазаара иаҳнаҭоит имариам аҭагылазаашьа аҧсахразы алшара бзиақәа. 2008 шықәсарзы аҧсуа ҳәынҭқарра ахьыҧшымра азханаҵеит адунеи аҿы зегьы иреиҳау, алшара дуқәа змоу аҳәынҭқарра-Урыстәылатәи Афедерациа. Уи ахахьы иагеит ҳаҧсадгьыл ахьчара. Абри аҭагылазаашьа ҳхы иаҳархәароуп ҧхьаҟатәи абиҧарақәа аҧеиҧш лаша рзаҧҵаразы.

 

Лымкаала шәыхшыҩ азысышьҭырц сҭахуп даҽа зҵаарак. Иахьатәи ҳџьабааи, ҳабацәеи ҳабдуцәеи ирхыргаз агәаҟрақәеи, ақырҭуа мпыҵахалаҩцәа ирҿагыланы аибашьраҿы иҭахаз ҳашьцәа ргәалашәареи изаҟаразаалак ҵакык роуран иҟаӡам иахьа аполитикатә провакациақәа ҳҽанраҳҭа, зыламыс цқьам аполитикцәа ҳажәлар рҭоурых рхатә зҵаарақәа рыӡбараҿы рхы иадырхәартә аҭагылазаашьа аныҟаҳҵа.

 

Сара иазгәасҭарц сҭахуп арҭ апровокациақәа рхыҵхырҭа Қырҭтәыла шакәу. Уахьынтәи иаашьҭыз, атәым мал иазгәышьуаз роуп шәабдуцәа рынхарҭақәа аанызкылоз амҳаџьырра аан, ақырҭуа ар роуп шықәсқәак раҧхьа шәареи ҳареи ҳашьцәа, ҳаҳәшьцәа зшьуаз. Ҟалашьа амаӡам аӷа уишьуа, умазара еимиҵәо, убри аамҭазы уара уахь агәыбылра ааирҧшуа, уаҵәтәи уҧеиҧш дазааҧсо. Абри ахаангьы иаҳхаҳмыршҭыроуп ҳара.

 

Акыр иаҧсоу ҳауаажәлар!

 

Адиаспора ажәлар ирыхәҭакуп. Шәареи ҳареи еицаҳзеиҧшуп ҳаҧсадгьыл, уи уаҵәтәи аҧеиҧш азгьы аҭакҧхықәра еицҳадуп. Шәара ашықәсқәа ирылганы иаажәгеит аҧсуа қьабзқәа, ишәмырӡит аҧсуа бызшәа, ҳмилаҭтә культура. Амшын ирны рыҧсадгьыл ахьчараз абџьар иаҵагылеит адиаспора ахаҭарнакцәа, ирацәаҩуп зыҧсадгьыл зхы ақәызҵаз.

 

Иахьа аҭагылазаашьа аҽанаҧсах, аамҭа ҳара ианҳацныҟәа ҳажәҩахыр еибаҳҭароуп, ҳамчқәа еидаҳкылароуп, ихьыҧшым адемокартиатә аҧсуа ҳәынҭқарра ашьақәыргылараҿы.

 

Аҵыхәтәантәи ашықәсқәа рзы ҳаимадара еиҳа-еиҳа аҽарҭбаауеит. Рыҧсадгьыл ахь иаауеит аҿар. Аҧсны аекономикатә ҭагылазаашьа зынӡа ишымариамгьы  Аиҳабыра адгылара арҭоит аҧсуаа рыҧсадгьыл ахь рырхынҳәра аус, хәыда-ҧсада урҭ нхарҭала реиқәыршәараҿы, аҵара-культуратә программақәа рзеиҿкаараҿы. Ари нахысгьы иҟаҳҵаша рацәоуп.

 

Аҧсны аекономика аҿиара рҽаладырхәыроуп абизнес знапы алаку адиаспора ахаҭарнакцәа. Хымҧада, уи цхыраагӡахоит Аҧсныи, ҳауаажәлар ахьынхо атәылақәеи рекономика-хәаахәҭратә еизыҟазаашьақәа реизырҳаразы.

 

Аҧсны анапхгара ибзиан еилыркаауеит ари азҵаараҿы иҟаҵатәу.

 

Аҧсуа ҳәынҭқарра ашьақәгылареи аҿиареи рус аҿы ҳаидгылара аҵак ду шамоу еилкааны, агәра шәсыргоит дарбанзаалак адиаспора ахаҭарнак иҳадигало Аҧсны иазеиӷьхаша проектк, программак Аҳәынҭқарра Ахадеи, аиҳабыреи, апарламенти, ауаажәларреи адгылара ӷәӷәа шарҭо.

 

Ҳажәлар ракзаареи, Аҧсны Аҳәынҭқарра аинтересқәа рыхьчареи аҧсуаа ҳзы зегьы ирыцкуп.

 

Ҳаҭыр зқәу Ассамблеиа алахәцәа!

 

Ақәҿиара дуқәа шәзеиӷьысшьоит шәнапы злаку имариам аус анагӡараҿы.

 

Ҳаҭырла,

 

Александр Анқәаб,

 

Аҧсны Аҳәынҭқарра Ахада

 

Ақ. Аҟәа

 

Ноиабр 26, 2011 ш.

 

26.11.2011  Аҧсныпресс

 

 Аҧсны аҧыза-министр Леонид Лакербаиа дырҧылеит Аҧсны Аџьынџьтәылатәи аибашьра (1992-1993ш.) аветеранцәа рфонд ахаҭарнакцәа

 

Аҧсны аҧыза-министр Леонид Лакербаиа дырҧылеит Аҧсны Аџьынџьтәылатәи аибашьра (1992-1993ш.) аветеранцәа рфонд ахаҭарнакцәа.

 

Аиҧылараҿы ирылацәажәеит 2012 шықәсазы афонд абиуџьет апроект ашьақәыргылареи уи аструктуреи рызҵаатәқәа; афонд аилазаара ашьақәырҕәҕәара апринципқәа.

 

Иазгәаҭатәуп, афонд ахаҭарнакцәа (15 ҩык рыла ишьақәгылоуп) рыбзоурала аинвалидцәа иҟарҵо аҳәарақәа ахылаҧшрада ишаанымхо.

 

Араҟа иара убас ирылацәажәеит Аҧсни уи анҭыҵи аинвалидцәа рыхәышәтәра аметодқәа ртәы. Аҧыза-министр иазгәеиҭеит афонд аҟны аус зуа, даҽа усурак иалармыгӡар ауп ҳәа. Афонд аҟны иҟоу ауснагӡатәқәа маҷӡам, урҭ ахылаҧшра бзиа рҭахәуп, - иҳәеит иара.

 

25.11.2011 Аҧсныпресс

 

 Аҧсны аҧыза-министр актәи ихаҭыҧуаҩ Индира Аҩардан аҧсуа ателерадиоеилахәыра аусзуҩцәа рхантәаҩы ҿыц дыдлырдырит

 

Аҧсны аҧыза-министр актәи ихаҭыҧуаҩ Индира Аҩардан аҧсуа ателерадиоеилахәыра аусзуҩцәа рхантәаҩы ҿыц дыдлырдырит. Аҧсны Ахада Александр Анқәаб иусҧҟала Алхас Ҷолокәуа дҟаҵоуп аҧсуа ателерадиоеилахәыра ахантәаҩыс.

 

Индира Аҩардан аҧсуа ателерадиоеилахәыра аусзуҩцәа рхантәаҩы даныдлырды...руаз иазгәалҭеит, Алхас Ҷолокәуа араҟа ибзианы ирдыруа, зыпрофессионлтә ҩаӡара ҳаракәы шиакәы.

 

Индира Аҩардан илҳәеит, атәыла аиҳабыра изларылшо ала ателехәаҧшра аҿиара ишадгыло.

 

Аҧсуа ателерадиоеилахәыра аусзуҩцәа рхантәаҩы ҿыц имаҵура иахагылара идырныҳәало ирҳәеит изларылшо ала адгылара ширҭо.

 

Алхас Ҷолокәуа ихәҭакахьала игәрагаразы даараӡа иҭабуп ҳәа иҳәеит. Сара ари амаҵура ахагылара санакәшаҳаҭхоз, сзықәгәыҕуаз схы аасҭа шәара аколлектив шәакәын. Араҟа аус руеит аҧышәа змоу реиҧш ажурналист ҿарацәа. Ҳара зегьы ҳаидгыланы аус ҳуеит, агәыҕра сымоуп ҳусура алҵшәа иаарласны ҳахәаҧшҩцәа ирбап ҳәа, - иҳәеит иара.

 

25.11.2011 Аҧсныпресс

 

 Инна Аџьынџьал дҟаҵоуп Аҧсны Ахада иҧкаанҵазы аусбарҭа аиҳабыс

 

Инна Аџьынџьал дҟаҵоуп Аҧсны Ахада иҧкаанҵазы аусбарҭа аиҳабыс. Уи азы аусҧҟа инапы аҵеиҩит Аҧсны Ахада Александр Анқәаб.

 

24.11.2011  Аҧсныҧресс / Аҧсны Аҳәынҭқарра Аминистрцәа Реилазаара

 

 Алхас Ҷолокәуа дҟаҵоуп аҧсуа ателерадиоеилахәыра ахантәаҩыс

 

Аҧсны Аҳәынҭқарра Ахада Александр Анқәаб иусҧҟала аҧсуа ателерадиоеилахәыра ахантәаҩыс дҟаҵоуп Алхас Ҷолокәуа. Аусҧҟа инақәыршәаны Алхас Ҷолокәуа Аҧсны Ахада иҟны аинформациатә усбарҭа анапхгаҩы ихаҭыҧуаҩра аҟынтәи ихы дақәиҭуп.

 

Алхас Дмитри-иҧа Ҷолокәуа диит 1976 ш. апрель 22 рзы, Очамчыра араион Ҷлоу ақыҭан. 1992 ш. рзы ...далгеит Аҟәатәи ашкол-интернат.

 

1998 ш. рзы далгеит Аҧснытәи Аҳәынҭқарратә университет ажурналистика аҟәша.

 

1994 ш. раахыс аус иуан аҧсуа ателерадиоеилахәыра аҟны аинформациа аҟәша акорреспондентс.

 

2003 ш. рзы далгеит М. Ломоносов ихьӡ зху Москватәи Аҳәынҭқарратә университет аҟны ажурналистика акурсқәа.

 

2005 ш. рзы Аҧсны Ахада иусҧҟала дҟаҵан атәыла ахада иҟны аинформациатә усбарҭа анапхгаҩы ихаҭыҧуаҩс.

 

Ажурналистцәа Реидгыла далоуп.

 

Аҭаацәара даламлаӡац.

 

24.11.2011  Аҧсныҧресс / Аҧсны Аҳәынҭқарра Аминистрцәа Реилазаара

 

 Сергеи Саркисиан инапы ианҵоуп агазеҭ Республика Абхазия аредактор хада инапынҵақәа рынагӡара

 

Сергеи Саркисиан инапы ианҵоуп агазеҭ Республика Абхазия аредактор хада инапынҵақәа рынагӡара. Уи азы адҵа ҟаиҵеит аҧыза-министр Леонид Лакербаиа. С. Саркисиан уаанӡа ари агазеҭ аредактор хада ихаҭыҧуаҩс дыҟан.

 

24.11.2011  Аҧсныҧресс / Аҧсны Аҳәынҭқарра Аминистрцәа Реилазаара

 

 Индира Аҩардан агазеҭ Аҧсны аколлектив аредактор ҿыц Владимир Қапба дыдлырдырит

 

Аҧсны аҧыза-министр актәи ихаҭыҧуаҩ Индира Аҩардан агазеҭ Аҧсны аколлектив аредактор ҿыц Владимир Қапба дыдлырдырит.

 

Аҧыза-министр Леонид Лакербаиа иҟаиҵаз адҵала Владимир Қапба дҟаҵоуп агазеҭ Аҧсны аредактор хадас. В. Қапба иара убас Аҧсны ажурналистцәа Реидгыла ахантәаҩра азиуеит.
 

Владимир Қапба шәара шәколлега иоуп, ари агазеҭ аҟны аус иуеижьҭеи акрааҵуеит. Иара дпублициступ, иус ибзианы идыруеит. Агәраганы сыҟоуп аусицура маншәалахап ҳәа, избан акәзар шәыпроблемақәа ибзианы идыруеит, урҭ шыӡбатәугьы идыруеит, - лҳәеит Индира Аҩардан.

 

Убриаан аҧыза-министр ихаҭыҧуаҩ иазгәалҭеит ҧасатәи аредактор Борис Ҭыжәба акыр шықәса қәҿирала агазеҭ амаҵ шазиуаз.

 

Борис Ҭыжәба Владимир Қапба имаҵура иахагылара идиныҳәалеит, изеҕьаишьеит ақәҿиарақәа. Иара агәыҕра ааирҧшит агазеҭ сахьалеи ҵакылеи аинтерес аҵаны ишыҟало ала.

 

Аредактор ҿыц иганахьала иҭабуп ҳәа иҳәеит игәрагаразы. Иара иазгәеиҭеит агазеҭ аҟны иҟоу апроблемақәа шмаҷым, насгьы агәраганы дыҟоуп урҭ рыӡбаразы зегьы еидгыланы ирылшо зегьы шыҟарҵо.

 

24.11.2011  Аҧсныҧресс / Аҧсны Аҳәынҭқарра Аминистрцәа Реилазаара

 

 Владимир Қапба дҟаҵоуп агазеҭ Аҧсны аредактор хадас

 

Владимир Қапба дҟаҵоуп агазеҭ Аҧсны аредактор хадас. В. Қапба иара убас Аҧсны ажурналистцәа Реидгыла ахантәаҩра азиуеит.

 

23.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Ҭамаз Ҵахнакиеи Владимир Берулааи ҟаҵоуп Аҧсны Аҳәынҭқарра агәабзиарахьчара аминистр ихаҭыҧуаҩцәас

 

Аҧсны Аҳәынҭқарра Аминистрцәа реилазаара иаднакылаз ақәҵара инақәыршәаны Ҭамаз Ҵахнакиа деиҭаҟаҵоуп агәабзиарахьчара аминитср ихаҭыҧуаҩс.

 

Асанитартә-епидемиалогиатә хылаҧшразы агәабзиарахьчара аминистр ихаҭыҧуас дҟаҵоуп Владимир Берулаа.

 

23.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Аҧсны имҩаҧысуеит Аурыс бызшәа амчыбжь

 

Аҧсны имҩаҧысуа Аурыс бызшәа амчыбжь аҳәаақәа ирҭагӡаны Аҟәа ақалақь Пушкин ихьӡ зху аҩбатәи аурыс школ аҟны имҩаҧган асеминар-практикум. Асеминар инадҳәаланы имҩаҧган Аурыс бызшәа амчыбжь аофициалла аартра. Уи иалахәын Аҧсны иҟоу Урыстәыла ацҳаражәҳәаҩ Семион Григориев, Аҧсны аҵара аминистр Даур Наҷҟьебиа, Аҧсны иҟоу Россотрудничество ахаҭарнак Александр Ваулин.

 

Ҳара адунеи ҳацәажәоит, адунеи ҳара аурыс бызшәала иҳацәажәоит, - иҳәеит Даур Наҷҟьебиа, иара иазгәеиҭеит аҧсуа школқәа рҟны аурыс бызшәа арҵара ахаҭабзиара шышьҭыхтәу.

 

Аҧсны иҟоу Урыстәыла ацҳаражәҳәаҩ Семион Григориев агәыҕра ааирҧшит ас еиҧш иҟоу апрограммақәа Аҧсны алҵшәа бзиақәа азаанагап ҳәа.

 

Аурыс бызшәа арҵареи аиқәырхареи ирызкәу аусмҩаҧгатәқәа еиҿкаауп Аҧсны иҟоу Россотрудничество ахаҭарнакра абзоурала, иара мҩаҧгахоит ҳазну ашықәс ноиабр мза 21 инаркны 25 нӡа.

 

23.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Давид Ирадиани Виктор Басаргини рнапы аҵарҩит Аҧсны аекономика аминистрреи Урыстәыла арегионалбжьаратә министрреи русеицзуразы амеморандум, Аҧсны асоциал-економикатә ҿиара аганахьала

 

Аҧсны аекономика аминистр Давид Ирадиани Урыстәыла арегионалбжьаратә министр Виктор Басаргини рнапы аҵарҩит Аҧсны аекономика аминистрреи Урыстәыла арегионалбжьаратә министрреи русецзуразы амеморандум, Аҧсны асоциал-економикатә ҿиара аганахьала.

 

Урыстәылеи-Аҧсни ахҧатәи русутә форум аҳәаақәа ирҭагӡаны Аҧсни Урыстәылеи рыбжьара асоциал-економикатә ҿиара аҟны аусецзуразы анапы рыҵаҩын еиуеиҧшым аиқәшаҳаҭрақәа.

 

2012 ш. рзы аҩ-ганк рыпрограмма инақәыршәаны аусецзуразы аиқәшаҳаҭра рнапы аҵарҩит Аҧсны акурорти атуризми рзы аҳәынҭқарратә еилаки Урыстәыла атуризми, аспорти, аҿар рполитикеи рзы аминистрра рхаҭарнакцәа. Аҧсны ахәаахәҭра-ааглыхратә палата ахантәаҩы Генади Гагәлиеи Астрахантәи ахәаахәҭра-ааглыхратә палата ахантәаҩы ихаҭыҧуаҩ Александр Чернышови рнапы аҵарҩит аусеицзуразы аиқәшаҳаҭра. Иара убас аиқәшаҳаҭра рыбжьарҵеит Аҧсни Даҕсҭани ахәаахәҭра-ааглыхратә палатақәа рыбжьара.

 

Аҧснытәи Аҳәынҭқарратә университети Шәачатәи Аҳәынҭқарратә университети рыбжьара аусеицзуразы аиқәшаҳаҭра рнапы анырҵеит ААУ аректор Алеко Гәарамиеи СГУ аректор Галина Романовеи.

 

18.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Аҧсни Урыстәылеи акультура аминистррақәа аусеицзура иазыхиоуп

 

Аҧсны акультура аминистр Бадра Гәымбеи диҧылеит Урыстәыла акультура аминистр ицхырааҩ Лев Ӡугаев.

 

Аиҧылараҟны ирылацәажәеит 2012-2013ш. рзы аминистррақәа русеицзура азҵаарақәа.

 

Ӡугаев Аҧсны акультура аминистр ҿыц Бадра Гәымба имаҵура иахагылара идиныҳәалеит. Иара агәыҕра ааирҧшит аҩ-ган русеицзура алҵшәа бзиақәа аанагап ҳәа.

 

Аиҧылара мҩаҧысит Урыстәылеи-Аҧсни ахҧатәи русутә форум аҳәаақәа ирҭагӡаны.

 

18.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Аҟәа имҩаҧысит Аҧсни Урыстәылеи рыбжьара асоциал-економикатә усеицзуразы аиҳабырабжьаратә комиссиа алахәылацәа IV реилатәара

 

Аҟәа имҩаҧысит Аҧсни Урыстәылеи рыбжьара асоциал-економикатә усеицзуразы аиҳабырабжьаратә комиссиа алахәылацәа IV реилатәара.

 

Аилатәара иалахәыз бзиала шәаабеит ҳәа раҳәо Аҧсны аҧыза-министр Леонид Лакербаиа иазгәеиҭеит ҩ-шықәса ирылагӡаны Аҧсны асоциал-економикатә ҿиара аганхьала иҟаҵоу шырацәоу. Ицоит амҩақәеи афымцалашареи рсистема аиҭашьақәыргылара, аремонттә усурақәа цоит ашколқәа, ахәыҷбаҳчақәа, ахәышәтәырҭақәа, атеатрқәа, аҩнқәа рҟны, аус адулоуп ақыҭанхамҩа аҿиаразы аинтерес зҵоу апроектқәа. Иахьа ҳара иаҳбеит Гагра еиҭашьақәыргылоу абжьаратә школ. Уаҵәы шәара ишәырбахоит зхаҭабзиара ҳаракны еиҭашьақәыргылоу ареспубликатә хышәтәырҭа акорпусқәа руак, - иҳәеит аҧыза-министр.

 

Акомиссиа алахәылацәа ирылацәажәеит 2010-2012ш. рзтәи акомплекстә план азҵаатәқәа, урҭ рынагӡареи иахәҭоу аҧсахрақәа ралагалареи рзы.

 

Аилатәараҿы иӡбан ахәбатәи аиҳабырабжьаратә комиссиа алахәылацәа реилатәра 2012ш. рзы Урыстәыла амҩаҧгара.

 

17.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Еиҭашьақәыргылоуп Гагратәи аҩбатәи аурыс абжьаратә школ

 

Краснодартәи атәылаҿацә агәбернатор Александр Ткачиов иҟаиҵаз ацхыраарала еиҭашьақәргылоуп В.И.Попков ихьӡ зхәу Гагратәи аҩбатәи аурыс абжьаратә школ.

 

Ашкол аартра ацеремониа иалахәын Урыстәыла Афедерациа арегионалтә ҿиара аминистр Виктор Басаргин, Аҧсны аҧыза-министр Леонид Лакербаиа, Аҧсны Ахада иусбарҭа аиҳабы Беслан Кәыбраа, Аҧсны иҟоу Урыстәыла ацҳаражәҳәаҩ Семион Григориев, Гагра араион администрациа ахада иусқәа назыгӡо Григори Еныкь уҳәа Урыстәылантәи асасцәа аӡәырҩы.

 

Краснодартәи атәылаҿацә агәбернатор иусбарҭа ахаҭарнак Олег Качалов араҟа еизаз Александр Ткачиов ихьӡала ашкол аартра рыдиныҳәалеит. Иара иажәақәа рыла ари раҧхьаӡатәи ашьаҿа ауп Аҧсни Краснодари раҧхьаҟатәи русеицыураҟны.

 

Ашкол аартра адҳәалоуп иахьа Аҧсны иаатуа Урыстәылеи-Аҧсни ахҧатәи русутә форум. Афорум аҳәаақәа ирҭагӡаны ноиабр 18 рзы иазгәаҭоуп Аҧсны иҟоу Урыстәыла ацҳаражәҳәара ахыбра ҿыц аартра. (Ихадоу ахыбра аргылараҟынӡа ацҳаражәҳәара ахыбра ҟалоит Аҟәа, ҧаса асасааирҭа Ясемин ахьыҟаз).

 

Ари аҽны иаартхоит ареспубликатә хәышәтәырҭа актәи акорпус. Ахәышәтәырҭа акорпус еиҭашьақәыргылан Аҧсны асоциал-економикатә ҿиара акомплекстә план аҳәаақәа ирҭагӡаны. Афорум амҩаҧгара хықәкыс иамоуп Аҧсни Урыстәылеи русеицыураҟны еиҳа ихадароу азҵаарақәа рыҭҵаара.

 

Афорум иалахәхоит 500 ҩык инарзынаҧшуа ауааҧсыра. Урҭ рахьтә 200 ҩык Урыстәылантәи иааз роуп.

 

17.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Иаҧцоуп аҳәынҭқарратә комиссиа Аҧсны Ахада Сергеи Багаҧшь ихьӡ анаӡаӡатәразы

 

Аҧсны Аҳәынҭқарра Ахада Александр Анқәаб иусҧҟала иаҧҵоуп аҳәынҭқарратә комиссиа Аҧсны Ахада Сергеи Багаҧшь ихьӡ анаӡаӡатәразы.

 

Аҧсны Ахада ихаҭыҧуаҩ Михаил Логәуа хадара ззиуа аҳәынҭқарратә акомиссиа иалоуп: аҧыза-министр актәи ихаҭыҧуаҩ Индира Аҩардан, Жәлар Реизара аиҳабы ихаҭыҧуаҩ Виачеслав Цыгәба, Аҧсны Ахада иҟны иҟоу аинформациатә усбарҭа аиҳабы Кристиан Бжьаниа, акультура аминистр Бадра Гәымба, Аҟәа ақалақь ахада Алиас Лабахәуа, Очамчыра араион администрациа ахада Мурман Џьопуа.

 

Аҳәынҭқарратә комиссиа иадуп февраль мза 1 аҟынӡа ажәалагалақәа рцәыргара.

 

17.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Алексеи Арҷелиа дҟаҵоуп Аҟәа ақалақь аҿари аспорти рзы аилак ахантәаҩыс

 

Аҟәа ақалақь ахадара иаднакылаз ақәҵара инақәыршәаны Алексеи Арҷелиа дҟаҵоуп Аҟәа ақалақь аҿари аспорти рзы аилак ахантәаҩыс.

 

15.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Иракли Черқезиа дҟаҵоуп аекономика аминистр ихаҭыҧуаҩс

 

Аҧсны Аҳәынҭқарра Аминистрцәа Реилазаара иаднакылаз ақәҵара инақәыршәаны аекономика аминистр ихаҭыҧуаҩс дҟаҵоуп Иракли Черқезиа;

 

Виачеслав Барцыц дҟаҵоуп акурорти атуризми рзы аҳәынҭқарратә еилакы ахантәаҩы ихаҭыҧуаҩс;

 

Оҭар Ҷыҭанаа дҟаҵоуп астандарти, аметрологиеи асертификациеи рзы аҳәынҭқарратә еилакы ахантәаҩы ихаҭыҧуас.

 

15.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Григори Еныкь дҟаҵоуп Гагра араион администрациа ахада инапынҵақәа рынагӡаҩыс

 

Иахьа Аҧсны Ахада Александр Анқәаб инапы аҵеиҩит аусҧҟа, Григори Еныкь Гагра араион администрациа ахада инапынҵақәа рынгӡаҩыс иҟаҵаразы.

 

Ҧасатәи Гагра араион администрациа ахада Асҭамыр Қьецба ҳазну ашықәс сентиабр мзазы имаҵураҟынтәи ихы дақәиҭын.

 

Григори Еныкь уаанӡа Аҧсны Ахада иусбарҭа анапхгаҩыс дыҟан.

 

15.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Атәанчахәы азы аҳәынҭқарратә фонд анапхгаҩ ҿыц дамоуп

 

Аҧсны аҧыза-министр актәи ихаҭыҧуаҩ Индира Аҩардан атәанчахәы азы аҳәынҭқарратә фонд аусзуҩцәа рнапхгаҩы ҿыц дыдлырдырит. Аҧсны Ахада иусҧҟала ноиабр 11 рзы атәанчахәы азы аҳәынҭқарратә фонд анапхгаҩыс дҟаҵан Руслан Аџьба.

 

Руслан Аџьба инапы злакыз аус еснагь қәҿиарала инаигӡон. Иара далгеит Аҧснытәи Аҳәынҭқарратә университет , идырра ҳаракәуп, аҧышәа бзиа имоуп. Ҳара агәра ганы ҳаҟоуп иара илшап ҳәа атәанчахәы азы фонд қәҿиарала аус азура, - лҳәеит Индира Аҩардан.

 

Аҧыза-министр ихаҭыҧуаҩ агәыҕра аалрыҧшит анапхгаҩ ҿыц иаарласны афонд аҭагылазаашьа аиҕьтәразы илагалақәа ҟаиҵап ҳәа.

 

Руслан Аџьба иганахьала атәыла анапхгара игәрагаразы иҭабуп ҳәа реиҳәеит.

 

14.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Ашәахьа, ноиабр 28 Аҧсны иҧсшьарамшны иҧхьаӡоуп

 

Аҧсны Аконституциа Амш - ноиабр 26, сынтәа асабша иахьақәшәо инамаданы, ашәахьа ноиабр 28 иҧсшьарамшны иҧхьаӡоуп.

 

14.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Ихыркәшахеит Аҧсны Аҳәынҭқарреи Урыстәыла Афедерациеи рҳәынҭқарратә ҳәаа аделимитациа азыуразы аҳәынҭқарратә комиссиақәа ахҧатәи реилатәара

 

Иахьа Аҟәа ихыркәшахеит Аҧсны Аҳәынҭқарреи Урыстәыла Афедерациеи рҳәынҭқарратә ҳәаа аделимитациа азыуразы аҳәынҭқарратә комиссиақәа ахҧатәи реилатәара.

 

Хымыш рыҩныҵҟа имҩаҧысуаз аилатәара иалҵшәаханы аҩганк ранапы аҵарҩит аҳәынҭқарратә ҳәаа аделимитациа азыуразы аиҿцәажәарақәа ишрыцҵахо шьақәзырҕәҕәо апротокол.

 

10.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Аҧснытәи амилициа иахыҵит 90 шықәса

 

Иахьа Аҧснытәи амилициа иазгәанаҭоит 90 шықәса ахыҵра. Ари арыцхә инамаданы аҩныҵҟатәи аусқәа рминистрра ахыбраҿы имҩаҧысит агәырҕьаратә еилатәара. Аилатәара далахәын аҧыза-министр Леонид Лакербаиа.

 

Аныҳәа хацыркын Ахьӡ Аҧша апаркаҿ аџьынџьтәылатәи еибашьраан (1992-1993ш.) иҭахаз аҵеицәа рбаҟа амҵан ашәҭқәа рышьҭаҵарала.

 

Анаҩыс аилатәараҿы дықәгылеит аҩныҵҟатәи аусқәа рминистр Оҭар Хьециа. Иара иазгәеиҭеит аибашьраан ишҭахаз 41 ҩык амилициа аусзуҩцәа, урҭ рахьтә 9 ҩык Аҧсны Афырхаҵа ҳәа ахьӡ рыхҵоуп, 7 ҩык ианҭаха ашьҭахь Леон иорден ранашьоуп, 11 ҩык Агәымшәараз амедаль. Аибашьра ашьҭахь рмаҵура анагӡараан иҭахеит 64 ҩык амилициа аусзуҩцәа. Оҭар Хьециа иажәақәа рыла, иахьа амилициа аҟны аус руеит аибашьра аветеранцәагьы.

 

Амилициа аусзуҩцәа рпрофессионалтә ныҳәа рыдиныҳәалеит аҧыза-министр Леонид Лакербаиа. Шәара шәзанааҭ даара иуадаҩуп. Гәыкала ишәыдысныҳәалоит. Сгәы иаанагоит ихадоу шәхықәкқәа амилициа аусбарҭақәа рыгәрагара архынҳәра ауп ҳәа, - иҳәеит аҧыза министр. Леонид Лакербаиа иҳәеит атәыла анапхгара рганахьала амилициа аусбарҭақәа ирыхәҭоу ацхыраара рыҭахоит ҳәа.

 

Амилициа аусзуҩцәа рныҳәа рыдныҳәало иқәгылеит иара убас, апрокурор хада Сафарбеи Мқанба, атәылахьчара аминистр ихьӡала адныҳәаларатә шәҟәы даҧхьеит атәылахьчара аминистр ашаб хада ахантәаҩы ихаҭыҧуаҩ Олег Аршба.

 

Атәылахьчара аминистр иусҧҟала аҩныҵҟатәи аусқәа рминистр Оҭар Хьециа ианашьоуп За боевое содружество ҳәа амедаль.

 

Аиубилеи ахьӡала гәыҧҩык амилициа аусзуҩцәеи аҩныҵҟатәи аусқәа рминистрра аветеранцәеи иранашьан агәаларшәгатә ҳамҭақәа.

 

10.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Амонументальтә скәльптура азҵаарақәа ирылацәажәеит иахьа аҧыза-министр Леонид Лакербаиеи асахьаҭыхыҩцәа реидгыла аколлегиа алахәылацәеи

 

Амонументальтә скәльптура азҵаарақәа ирылацәажәеит иахьа аҧыза-министр Леонид Лакербаиеи асахьаҭыхыҩцәа реидгыла аколлегиа алахәылацәеи.

 

Асахьаҭыхыҩцәа алагалажәа ҟарҵеит амонументалтә усумҭақәа рзы аҳәынҭқарратә комиссиа аҧҵазарц. Дара ргәаанагарла амонументалтә комплексқәа, аскәльптуратә усумҭақәа, амемориалтә ҕәқәа уҳәа рыргылара иахәҭоу астандартқәа инарықәыршәаны имҩаҧгалатәуп. Иара убас иҳәан акомисса аилазаара иалало рыхьӡгьы.

 

Аиҧылара алахәылацәа ари азҵааразы ақәҵара адкылара иақәшаҳаҭхеит.

 

10.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Аҧыза-министр инапы аҵеиҩит адҵа аминистрцәеи аҳәынҭқарратә еилакқәа рхаҭыҧуааи рыҟаҵаразы

 

Аҧыза-министр Леонид Лакербаиа инапы аҵеиҩит адҵа аминистрцәеи аҳәынҭқарратә еилакқәа рхаҭыҧуааи рыҟаҵаразы. Уи инақәыршәаны Роберт Аршба дҟаҵоуп аџьеи асоциалтә рҿиареи аминистр лхаҭыҧуаҩс, Владимр Дауров ақыҭанхамҩа аминистр ихаҭыҧуаҩс, Ахмат Маршьан арепатриациазы аҳәынҭқарратә еилакы ахантәаҩы ихаҭыҧуаҩс, Гәдиса Агрбеи Иури Логәуеи аҿари аспорти рзы аҳәынҭқарратә еилакы ахантәаҩы лхаҭыҧуаҩцәас.

 

10.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Аҧсны адәныҟатәи аусқәа рминистр Виачеслав Чыркба дырҧылеит Еиду Амилаҭқәа рыҿиара апрограмма ахаҭарнакцәа

 

Аҧсны адәныҟатәи аусқәа рминистр Виачеслав Чыркба дырҧылеит Еиду Амилатқәа рыҿиара апрограмма ахаҭарнакцәа.

 

Аиҧылараҿы ирылацәажәеит агәабзиарахьчара азҵаара аганахьала аусеицыура атәы. Еиду Амилаҭқәа рхаҭарнакцәа рделегациа ахадара азызуаз Џьеими МакГолдрик агәҕра ааирҧшит иазгәаҭоу апроектқәа рынагӡара шалыршахо ала.

 

Адәныҟатәи аусқәа рминистр асасцәа иҭабуп ҳәа реиҳәеит Аҧсны иазыҟарҵо агәманитартә цхыраара азы, насгьы иазгәеиҭеит Аҧсны аусеицыура зҭахәы аҳәынҭқаррақәа зегьы рзы ишаарту.

 

Аиҧылара ахыркәшамҭаз асасцәа аминистр иҭабуп ҳәа иарҳәеит идкыларазы.

 

10.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Аҧсны Жәлар Реизара аделегациа Аахыҵ Уаҧстәыла Ахада иалхрақәа ирылахәхоит жәларбжьаратәи анаҧшыҩцәа раҳасабала

 

Аахыҵ Уаҧстәыла апарлмаент ахантәаҩы З.Р.Кокоев иааҧхьарала, Аҧсны Жәлар Реизара адепутатцәа Витали Смыри Иури Зыхәбеи Аахыҵ Уаҧстәыла Ахада иалхрақәа ирылахәхоит жәларбжьаратәи анаҧшыҩцәа раҳасабала.

 

10.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Аҧыза-министр Леонид Лакербаиа дырҧылеит Аҧсны жәлар рџьынџьтәылатәи еибашьра аветеранцәа рфонд ахаҭарнакцәа

 

Аҧыза-министр Леонид Лакербаиа дырҧылеит аҳәынҭқарратә биуџьет иатәым Аҧсны жәлар рџьынџьтәылатәи еибашьра (1992-1993ш.) аветеранцәа рфонд ахаҭарнакцәа.

 

Аиҧылараҿы ирылацәажәеит есымзатәи ауалафахәы аҟынтәи 1,5% афонд ахь иалалараны иҟоу аҧара ианаамҭоу ишахырмыҧхьаӡало атәы. Уи иҕәҕәаны ианыруеит аинвалидцәа рзы еиҿкаау амедицинатә программа анагӡараҟны.

 

Афонд инанагӡоит аусмҩаҧгатәқәа рацәаны . Уи апротез ҟаҵара, асанаториатә хәшәтәра, аоперациақәа , апсихологиатәи цхыраара . Ҳара ари азҵаара аӡбаразы иахәҭоу ахылаҧшра ҟаҳҵоит, - иҳәеит аҧыза-министр.

 

Иахьатәи аамҭазы Аҧсны иҟоуп 1600 ҩык аибашьра (1992-1993ш.) аветеранцәа.

 

Афонд аҧҵан ҳазну ашықәс ианвар мзазы. Ари аамҭа иалагӡаны 400 ҩык аинвалидцәеи урҭ рҭаацәеи ацхыраара рыҭан.

 

09.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Апарламент иаднакылеит ақәҵара Жәлар Реизара адепутат Беслан Џьопуа имаҵура иаҟәыхразы

 

Апарламент иаднакылеит ақәҵара Аҧсны Жәлар Реизара адепутат Беслан Џьопуа имаҵура иаҟәыхразы.

 

Убри аҩыза ақәҵара апарламент иаднакылеит Беслан Џьопуа Аҧсны ақыҭанхамҩа аминистрс иҟаҵара инамаданы.

 

Беслан Џьопуа Аҧсны Жәлар Реизара адепутатс далхын Очамчыратәи алхырҭатә ҭыҧ №29 аҟынтәи.

 

09.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Аҧсны Жәлар Реизара адепутатцәа реилатәара мҩаҧысит

 

Иахьа имҩаҧысит Аҧсны Жәлар Реизара изаамҭанытәу аилатәара. Амшхәаҧштә аҟны иқәгылан 10 зҵаарак инарзынаҧшуа. Апарламент иаднакылаз азакәанқәа ируакуп Аҧсны Аҳәынҭқарреи Урыстәыла Афедерациеи рыбжьара ииашоу аихамҩатә аацҳара аратификациа азыуразы азакәанпроект.

 

Жәлар Реизараҟны Аҧсны Ахада ихаҭарнак Дмитри Шамба излазгәеиҭаз ала, ари азакәан анапы аҵаҩын 2010 ш. октиабр 16 рзы, Аҟәа имҩаҧысуаз жәларбжьаратәи аекономикатә форум аҳәаақәа ирҭагӡаны.

 

Дмитри Шамба иажәақәа рыла, аиқәшаҳаҭра иабзоураны Аҧснытәи аихамҩақәа реиҭашьақәыргылараҿы иалыршахеит 100 млн. мааҭ аиҷаҳара. Избан акәзар, аҳазалхратә тариф азы азакәан инақәыршәаны ас еиҧш иҟоу аиҳабырабжьаратә аиқәшаҳаҭрақәа рнаҩыс, аихамҩа аиҭашьақәыргыларазы иаагаз амыругақәа аҳазалхратә аизгақәа рҟнытә рхы иақәиҭын. Урыстәыла ари аиқәшаҳаҭра аратификациа азырыуӡом, уи амч аиуразы дара иазыҧшуп Аҧсны апарламент иҟанаҵо ашьақәырҕәҕәара.

 

 09.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Ноиабр 9 рзы Аҧсны Жәлар Реизара адепутатцәа реилатәара мҩаҧысуеит

 

Ноиабр 9 рзы Аҧсны Жәлар Реизара адепутатцәа реилатәара мҩаҧысуеит. Амшхәаҧштә аҟны ицәыргахоит 10 зҵаарак.

 

08.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Аҟәа имҩаҧысит Аҧсны Аҳәынҭқарреи Урыстәыла Афедерациеи рҳәынҭқарратә ҳәаа аделимитациа азыуразы аҳәынҭқарратә комиссиақәа реилатәара

 

Аҟәа имҩаҧысит Аҧсны Аҳәынҭқарреи Урыстәыла Афедерациеи рҳәынҭқарратә ҳәаа аделимитациа азыуразы аҳәынҭқарратә комиссиақәа реилатәара. Аҧсуа ган акомиссиа ахадара аиҭоит Жәлар Реизара адепутат Валери Кәарҷиа, аурыс ган акомиссиа ахантәаҩыс дамоуп Урыстәыла адәныҟатәи аусқәа рминистрра абжьагаҩ Вадим Постнов.

 

Иазгәаҭатәуп, аҩбатәи аилатәара ҳазну ашықәс март мзазы Москва ишымҩаҧысыз. Уаҟа иазгәаҭан аҳәынҭқарратә ҳәаа азҵаара СССР азакәан инақәыршәаны ишыӡбахо.

 

Валери Кәарҷиа иажәақәа рыла аҧсуа ган аделегациа ажурналистцәа рыцны, аҧхын Аибга аҳабла иаҭааит. Урҭ хықәкыс ирыман уатәи ауааҧсыра рынхашьа, рынҵышьа аилкаара. Излеилкаахаз ала Аибга ауаа маҷны инхоит, аӡын аамҭазы еиҳагьы имаҷуп, аҿар зынӡаск иҟаӡам, иҟам ашкол, адәқьанқәа, аимадара. Уаҟа инхо ауаа Адлертәи араион иҭаҩуп.

 

Аурыс ган акомиссиа ахантәаҩы Вадим Постнов иазгәеиҭеит, аҳәынҭқарратә ҳәаа аӡбаразы ҩ-проектк шырхьиоу. Иара иҳәеит ари апроект аҩганк акомиссиа алахәылацәа ргәаанагара ахырҳәаарц.

Анаҩыс аилатәара мҩаҧысуан ажурналистцәа аламырхәӡакәа.

 

08.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Ҧсхәы ақыҭа анхацәа атәанчаҩхәы аиуразы азҵаара аӡбара ирыцхрааит

 

Аҟәа, Ааигәа аҧыза-министр Леонид Лакербаиа иҟаиҵаз адҵала Аҟәа араион Ҧсхәы ақыҭа иаҭааит Аминистрцәа Реилазаара агәманитартәи асоциалтәи зҵаарақәа рыӡбаразы аспециалистцәа ргәыҧ.

 

Ари ақыҭа анхацәа ирызцәырҵуа апроблемақәа рацәоуп. Урҭ ируакуп атәанчаҩхәы аиура азҵаара. Уи инамаданы ақыҭахь дааган анотариус, еиуеиҧшым адакәментқәа реиқәыршәаразы. Аспециалистцәа рҧыларазы арахь иааит 30 ҩык инарзынаҧшуа ақыҭа ауааҧсыра. Араҟа ирылацәажәеит егьырҭ азҵаарақәагьы.

 

Ҧсхәытәи абжьаратә школ аҵаҩцәа рзы ирыҭан аҳамҭақәа.

 

03.11.2011 Аҧсныҧресс / Аҧсны Аҳәынҭқарра Аминистрцәа Реилазаара

 

 Аҟәатәи ахштә зауад аҟны аремонттә усурақәа ахыркәшарахь инеиуеит

 

Аҟәа, Аҧсны аҧыза-министр Леонид Лакербаиеи атәыла ахада иусбарҭа аиҳабы Беслан Кәыбрааи иаҭааит Аҟәатәи ахштә зауад. Уаҟа 2010-2012ш. рзтәи Аҧсны асоциал-економика аҿиара акомплекстә план инақәыршәаны аиҭашьақәыргыларатә усурақәа цоит.

 

Азауад аҟны ишьақәыргылоуп ҳаамҭа иақәшәо амыруга ҿыцқәа, урҭ аагоуп Италиантәи, иара убас Урыстәылантәи.

Аҟәатәи хштә зауад адиректор Геннади Амыҷба иажәақәа рыла хымыз ирылагӡаны аҭыҧантәи аспециалистцәа идырҵахоит атехника аҿыц ала аус аура. Араҟа иҭрыжьлоит акефир, асметана, ахаҷа, ашәқәа рыхкқәа, иара убас аршәы.

 

Леонид Лакербаиа дазҵаауан азауад асзуҩцәа зырманшәалаша аӡы, алашара уҳәа егьырҭ азҵаарақәа. Иара имҩаҧигаз агәаҭаратә усура гәахәарыла идикылеит. Азауад аремонт азыуразы иазалхын 100 млн. мааҭ.

 

02.11.2011  Аҧсныҧресс / Аҧсны Аҳәынҭқарра Аминистрцәа Реилазаара

 

 Ареспубликатә хәышәтәырҭа аҳақым хадас дҟаҵоуп Наргиза Харчлаа

 

Аҟәа, Агәабзиарахьчара аминистр Зураб Маршьан ареспубликатә хәышәтәырҭа аколлектив дыдирдырит рҳақьым хада Наргиза Харчлаа.

 

Наргиза Харчлаа диит 1960 ш. август 25 рзы, Тҟәарчал ақалақь аҟны.

 

1984 ш. рзы далгеит Аҩада-Уаҧстәыла аҳәынҭқарратә институт ахәышәтәратә факультет.

1984-1985 ш. рзы лҵара иацылҵон Новгородтәи абласттә хәышәтәырҭа аҟны.

1987 ш. раахыс аус луеит Аҧснытәи ареспубликатә хәшәтәырҭаҟны анестезиолог-ареаниматологҩыс.

 

02.11.2011  Аҧсныҧресс / Аҧсны Аҳәынҭқарра Аминистрцәа Реилазаара

 

 Гәылрыҧшь араион апрокурорс дҟаҵоуп Сергеи Аведиан

 

Аҟәа, Гәылрыҧшь араион апрокурорс дҟаҵоуп Сергеи Аведиан.

 

Сергеи Аведиан диит 1977ш. март мза 23 рзы, Очачмыра араион Лабра ақыҭан.

 

1984 ш. рзы дҭалеит Тамшьтәи абжьаратә школ, анаҩыс диасуеит Тиуменҟа.

1994 ш. рзы дҭалоит Тиументәи иреиҳаӡоу амилициа ашкол.

1996 ш. рзы диасуеит Аҧснытәи Аҳәынҭқарратә университет аҭоурыхтә-зинтә факультет ахь, дагьалгоит 2000 ш. рзы.

2001 ш. рзы дҟаҵан Очамчыра араион апрокуратура аусеилыргаҩыс.

2005 ш. рзы дҟаҵан Гәылрыҧшь араион апрокурор ихаҭыҧуаҩс.

 

Дҭаацәароуп, ҩыџьа ахшара драбуп.

 

02.11.2011  Аҧсныҧресс / Аҧсны Аҳәынҭқарра Аминистрцәа Реилазаара

 

 Аҧыза-министр аиустициа аминистрра аусзуҩцәа рнапхгаҩы ҿыц дыдирдырит

 

Аҟәа, Аҧсны аҧыза-министр Леонид Лакербаиа аиустициа аминистрра аусзуҩцәа рнапхгаҩы ҿыц Екатерина Онишьенко дыдирдырит.

 

Леонид Лакербаиа уаанӡа аиустициа аминистрс иҟаз Лиудмила Хоџьашвили лусуразы иҭабуп ҳәа леиҳәеит. Лара лакәзар, аус лыцызуаз аминистрра аусзуҩцәа иҭабуп ҳәа ралҳәеит русеицыуразы. Лиудмила Хоџьашвили аиустициа аминистраҿы 16 шықәса аус лыухьеит, урҭ рахьтә 10 шықәса аминистр ихаҭыҧуаҩс, 6 шықәса аминистрс.

 

Аиустициа аминистр ҿыц Екатерина Онишьенко атәыла анапхгара иҭабуп ҳәа ралҳәеит лыгәрагаразы. Лара илҳәеит илылшо зегьы шыҟалҵо лыгәрагара даҧсахарц.

 

01.11.2011  Аҧсныҧресс / Аҧсны Аҳәынҭқарра Аминистрцәа Реилазаара