AҦCУAA PЫБЖbbI

                    -------------------- Aҧcнынтәи aжәабжь ҿыцқәа--------------------     Аҧсуа шрифт



 
 Аҳауагәаҭаҩцәа ирымоу адырраҭара излаҳәо ала, Ҧсоуи Аҟәеи еимаздо амҩақәа рҟны аҵаа ҟалар алшоит

 

Аҳауагәаҭаҩцәа ирымоу адырраҭара излаҳәо ала, Ҧсоуи Аҟәеи еимаздо амҩақәа рҟны аҵаа ҟалар алшоит. Убри инамаданы, Аҧсны Аҳәынҭавтоинспеқциа анапхгара ауааҧсырара рахь аҳәара ҟарҵоит, февраль мза алагамҭазы иахьынӡауа амашьынақәа рыла аныҟәара мап ацәыркырц.

 

31.01.2012  Аҧсныпресс

 

 Иҧсҭазаара далҵит Аҧсны Афырхаҵа Александр Воински

 

Ажьырныҳәа 28 рзы, иҧсҭазаара далҵит 66 шықәса ирҭагылаз акапитан, Аҧсны Афырхаҵа Александр Воински.

 

Александр Воински абзиараз ҳәа иарҳәарц инеит атәыла анапхгара рхаҭарнакцәа, ауаажәларра, аибашьра аветеранцәа, иҩызцәа уҳәа Аҧсны Афырхаҵа згәы далсыз зегьы.

 

Александр Воински анышә дамардеит Михаиловтәи анышәынҭраҿы.

 

31.01.2012  Аҧсныпресс

 

 Леонид Лакербаиа идикылеит Швеицариа адәныҟатәи аусқәа рминистрра ахаҭарнакцәа

 

Аҧсны аҧыза-министр Леонид Лакербаиа идикылеит Швеицариа адәныҟатәи аусқәа рминистрра ахаҭарнакцәа. Аиҧылараҿы ирылацәажәеит Кавказ ашәарҭадаразы Женеватәи аилацәажәара азҵаара, убасгьы агәыҳалалратә цхыраара аганахьала аусеицура азҵаара.

 

30.01.2012  Аҧсныпресс

 

 Лоренцо Коҕониа дҟаҵоуп Гал араион аҩныҵҟатәи аусқәа рминистрра аҟәша аиҳабыс

 

Аҧсны Аҳәынҭқарра аҩныҵҟатәи аусқәа рминистр Оҭар Хьециа идҵаҟаҵарала амилициа аполковник Лоренцо Коҕониа дҟаҵоуп Гал араион аҩныҵҟатәи аусқәа рминистрра аҟәша аиҳабыс.

 

Уаанӡа Гал араион аҩныҵҟатәи аусқәа рминистрра аҟәша аиҳабыс иҟаз аподполковник Аветик Ҕәынџьиа даҽа маҵуракахь диагоуп.

 

30.01.2012  Аҧсныпресс

 

 Аҧсны адәныҟатәи аусқәа рминистр Виачеслав Чрыгба Нина Штански илыдиныҳәалеит Приднестровиатәи Молдавиатәи ареспублика адәныҟатәи аусқәа рминистрс лыҟаҵара

 

Аҧсны Аҳәынҭқарра адәныҟатәи аусқәа рминистр Виачеслав Чрыгба Нина Штански илыдиныҳәалеит Приднестровиатәи Молдавиатәи ареспублика адәныҟатәи аусқәа рминистрс лыҟаҵара.

 

Аҧсны Аҳәынҭқарра адәныҟатәи аусқәа рминистрра аколлектив ахьӡала, хаҭала сара сҟынтәи, шәмаҵура ҿыц аҟны ақәҿиарақәа шәзеҕьасшьоит, агәра ганы сыҟоуп қәҿиарала аус шеицаҳуа ҳтәылақәа реизыҟазаашьақәа рыҿиаразы, - ҳәа аҳәоит адныҳәалараҿы.

 

30.01.2012  Аҧсныпресс

 

 Алексеи Аџьынџьал дҟаҵоуп Аҧсны Аҳәынҭқарра ашәарҭадаратә хеилак амаӡаныҟәгаҩ ихаҭыҧуаҩс

 

Аҧсны Ахада Александр Анқәаб идҵаҟаҵарала Алексеи Аџьынџьал дҟаҵоуп Аҧсны Аҳәынҭқарра ашәарҭадаратә хеилак амаӡаныҟәгаҩ ихаҭыҧуаҩс.

 

А. Аџьынџьал диит 1964 ш. рзы. Далгеит Аҧснытәи Аҳәынҭқарратә университет, диуриступ, акыр шықәса аус иуан аҩныҵҟатәи аусқәа рминистрраҟны, дподполковникуп.

 

27.01.2012  Аҧсныпресс

 

 Атәылахьчара азҵаара арҕәҕәара иазкын Аҧсны Ахадеи атәылахьчара аминистри реиҧылара

 

Атәылахьчара азҵаара арҕәҕәара иалацәажәеит Аҧсны Ахада Александр Анқәаби атәылахьчара аминистр Мираб Кьышьмариеи реиҧылараҟны.

 

Аҧсны Ахада дазҵаауан арбџьармчқәеи архәҭақәеи рус аҭагылазаашьа, акадрқәа рызҵаара.

 

Мираб Кьышьмариа хыхь ишьҭыхыз азҵаарақәа дрылацәажәо иҳәеит, апроблема дууқәа шыҟам, аусмҩаҧгатәқәа рынагӡара аплан.

 

26.01.2012  Аҧсныпресс

 

 СССР Аконституциа ашҭа Сергеи Багаҧшь ихьӡ ахҵоуп

 

Аҟәа ақалақь СССР Аконституциа ашҭа Сергеи Уасил-иҧа Багаҧшь ихьӡ ахҵоуп.

 

Аҟәа ақалақь ахада Алиас Лабахәуа Аҧсны Ахада Сергеи Багаҧшь ихьӡ анаӡаӡатәразы иаҧҵоу аҳәынҭқарратә комиссиа аилатәара аҧкаанҵа инақәыршәаны, ақалақьтә еизара адепутатцәа ирыдигалеит азҵаара СССР Акнституциа ашҭа Сергеи Багаҧшь ихьӡ ахҵаразы. Адепутатцәа еицҿакны уи иақәшаҳаҭхеит.

 

Ботаническаиа амҩа академик Гиви Аиба ихьӡ ахҵоуп. Убри аҩыза аӡбамҭа рыдыркылеит академик 80-шықәса ихыҵра инамаданы.

 

26.01.2012  Аҧсныпресс

 

 Аҳәынҭқарратә комиссиа ишьақәырҕәҕәеит аплан Султан Сосналиев диижьҭеи 70 шықәса аҵра иазкны агәаларшәаратә усмҩаҧгатәқәа рынагӡаразы

 

Аҧсны Афырхаҵа Султан Сосналиев диижьҭеи 70 шықәса аҵра иазкны агәаларшәаратә усмҩаҧгатәқәа рынагӡаразы иаҧҵоу аҳәынҭқарратә комиссиа ишьақәнарҕәҕәеит аплан. Атәылахьчара аминистрреи аҵара аминистрреи Султан Сасналиев дыздыруаз Аҧсны Аџьынџьтәылатәи еибашьра (1992-1993ш) алахәылацәа алархәны аруааи ашколхәыҷқәеи рзы имҩаҧыргоит аиҧыларақәа.

 

Аҧсны Афырхаҵа ииубилеи аламҭалазы агазеҭ Аҧсни Республика Абхазиеи иҭрыжьуеит Султан Сосналиев изкәы астатиақәа, аҧсуа ателерадиоеилахәыра иазнархьиоит адокументалтә фильм, акультура аминистрреи Аҟәа ақалақь ахадареи имҩаҧыргоит аконкәрс иреҕьу абиуст апроект ацәыргаразы, Аҟәа ақалақь амҩақәа руак Султан Сосналиев ихьӡ ахҵахоит.

 

Атәыла анапхгара Ҟабарада-Балкариатәи ареспублика аҧсуаа ахатәгәаҧхаҩцәа реидгыла ацхыраара арҭоит Сосналиев иорден аҟаҵаразы, еиҿнакаауеит Султан Сосналиев имш иира аҽны, Мшаҧымза 23 рзы Аҧснытәи аделегациа уи иҧсадгьылахь рцара.

 

Мшаҧымза 27 рзы, Аҟәа имҩаҧгахоит аилатәара ду.

 

Аҧсны Афырхаҵа, ҧасатәи аҧыза-министр ихаҭыҧуаҩ, атәылахьчара аминистр , Ахьӡҧша аорден I-тәи аҩаӡара акавалер, аинрал-леитенант Султан Сосналиев ичымаза бааҧс иахҟьаны иҧсҭазаара далҵит 2008 ш. Абҵара 22 рзы.

 

Ҳазҭоу ашықәс, Ажьырныҳәа 18 рзы Аҧсны Аҳәынҭқарра Ахада Александр Анқәаб иусҧҟала иаҧҵан Аҳәынҭқарратә комиссиа, Султан Сосналиев диижьҭеи 70 шықәса аҵра иазкны агәаларшәаратә усмҩаҧгатәқәа рынагӡаразы. Аҧсны аҧыза-министр Леонид Лакербаиа анапхгара ззиуа аҳәынҭқарратә комиссиа иалоуп: атәылахьчара аминистр Мираб Кьышьмариа, Жәлар Реизара адепутат Зураб Аҩӡба, акультура аминистр Бадра Гәынба, Аҟәа ақалақь ахада Алиас Лабахәуа, аҧсуа ателерадиоеилахәыра ахантәаҩы Алхас Ҷолокәуа, атәыла ахада иабжьагаҩ Закан Нанба.

 

Султан Сосналиев диит 1942 ш. Мшаҧымза 23 рзы. Далгеит Сызрантәи аррратә аҵараиурҭеи Г. Жуков ихьӡ зхәу Арра-командаҟаҵаратә академиеи. Ихҵоуп СССР зҽаҧсазтәыз арратә ҧырҩы ҳәа ахьӡ. Иара дыруаӡкәуп Аҧсны Аџьынџьтәылатәи еибашьраан зхатәгәаҧхарала арахь иааны еибашьуаз аҵеицәа.

 

Аҧсны Аџьынџьтәылатәи еибашьраан (1992-1993ш) Султан Сосанлиев аштаб хада анапхгара азиуан, Аҧсны атәылахьчара аминистр актәи ихаҭыҧуаҩс дыҟан. 1994 ш. рзы ихҵан Аҧсны Афырхаҵа ҳәа ахьӡ.

 

26.01.2012  Аҧсныпресс

 

 Аҧсны адәныҟатәи аусқәа рминистр Виачеслав Чрыгбеи Урыстәылатәи Афедерациа адәныҟатәи аусқәа рминистр Сергеи Лаврови реиҧылара мҩаҧысит

 

Ажьырныҳәа 24 рзы, имҩаҧысит Аҧсны адәныҟатәи аусқәа рминистр Виачеслав Чрыгбеи Урыстәылатәи Афедерациа адәныҟатәи аусқәа рминистр Сергеи Лаврови реиҧылара. Дара алахәын аӡиас Ҧсоу иахҵоу аҧсуа-аурыс ҳәаа емаздо ацҳа ҿыц аартра ацеремониа. Иазгәаҭатәуп, ацҳа аартразы ишеиҧылаз ҩ-тәылак рхадацәа, Александр Анқәаби Дмитри Медведеви.

 

Аминистрцәа реиҧылара кьаҿ аҟны ирылацәажәеит иахьатәи азҵаарақәеи, аминистррақәа русеицыура аҿиараеи, хаҭала Аҧсны адәныҟатәи аусқәа рминистр Виачеслав Чрыгба аусутә визитла Урыстәылаҟа ицареи.

 

25.01.2012  Аҧсныпресс

 

 Виачеслав Чрыгбеи Филип Лефори ирылацәажәеит иаауа Женеватәи аиҿцәажәарақәа рымшхәаҧштә

 

Аҧсны адәныҟатәи аусқәа рминистр Виачеслав Чрыгба идикылеит Аладатәи Кавказ азы Европатәи Аидгыла ахаҭарнак ҷыда Филип Лефор иделегациа. Аҧсуа ган аҟынтәи аиҧылара иалахәын адәныҟатәи аусқәа рминистр ихаҭыҧуаҩ Иракли Хьинҭбеи адәныҟатәи аусқәа рминистрра жәларбжьаратәи аҟәша аиҳабы Лана Агрбеи.

 

Аиҧылараҟны тема хаданы ицәырган иаауа Женеватәи аиҿцәажәарақәа рымшхәаҧштә алацәажәара. Уи азы аҩганк ргәаанагарақәа еибырҳәеит.

 

24.01.2012  Аҧсныпресс

 

 Леонид Лакербаиа идикылеит Аладатәи Кавказ азы Европатәи Аидгыла ахаҭарнак ҷыда Филип Лефор иделегациа

 

Аҧсны аҧыза-министр Леонид Лакербаиа идикылеит Аладатәи Кавказ азы Европатәи Аидгыла ахаҭарнак ҷыда Филип Лефор иделегациа. Аиҧылара иалахәын аполитикатә абжьагаҩцәа Магдалена Фричова Гроно, Кевин Таит, Иозеф Бузалка, Стина Раиала.

 

Аделегациа алахәылацәа бзиала шәаабеит ҳәа раҳәо аҧыза-министр иазгәеиҭеит, Европатәи Аидгылеи Аҧсни ргәаанагарақәа шеиқәымшәогьы ас еиҧш иҟоу аиҿцәажәарақәа акыр ишхадароу. Европа ҳбара рҭахӡам аҟнытә араҟа акәзаргьы ҳаицәажәап. Ҳаиҿцәажәара иаанаго алҵшәақәа уи даҽа зҵаароуп, - ҳәа азгәеиҭеит Леонид Лакербаиа. Иара аделегациа алахәылацәа ирзеиҭеиҳәеит ареспубликаҿы иҟалахьоу аиҭакрақәа ртәы. Анаҩыс аиҧылара мҩаҧысуан ажурналистцәа аламырхәӡакәа.

 

Уи анхыркәшаха ашьҭахь Филип Лефор ажурналистцәа иреиҳәеит, иара Аҧсныҟа дшааз Аладатәи Кавказ азы Европатәи Аидгыла ахаҭарнак ҷыда иаҳасабала адагьы, Женеватәи аиҿцәажәарақәа рыцхантәаҩы иаҳасабалагьы.

 

Хара ҳрылацәажәеит Женеватәи аиҿцәажәарақәа рымҩаҧысшьеи Европатәи Аидгыла еиуеиҧшым апрограммақәа арегионаҿы рынагӡареи ртәы. Ҳгәаанагарақәа маҷк еиқәымшәозаргьы ҳаицәажәара аиҩызаратә ҟазшьа аманы имҩаҧысит, - иҳәеит Филип Лефор.

 

Аҧсны аҧыза-министр Леонид Лакербаиа иажәақәа рыла, аҧсуааи ақырҭқәеи рыбжьара аасҭа Аҧсни Европатәи Аидгылеи рыбжьара агәрагара рҕәҕәалатәуп.

 

Аҧыза-министр инаҵшьны иазгәеиҭеит, Аҧсны еснагь ихьаҧшым аҳәынҭқарра аҳасабала ахатә позициа шамазаауа, насгьы европатәи аструктурақәа рҟнытә азинеиҟарара аиура ишадгылазаауа.

 

24.01.2012  Аҧсныпресс

 

 Аҧсны илеиз асы ацитрустә шәырқәа ааха ҕәҕәа рынаҭеит

 

Сынтәатәи ашықәс ацитрустә шәырқәа рзы акыр иуадаҩын. Зааӡа иҟалаз аҵаарақәа ирыхҟьаны ашәырқәа аҩежьхара иахьымӡеит. Убри иахҟьаны, аҽаҩра аҵла ишаҿац иаҿан. Илеиз асы уи зынӡа иҧхасҭанатәит.

 

Урыстәылатәи аҳазалхыҩцәа ракәзар, Ҧсоу аҳәаа аидара ду ахызго атранспорт ахыҵра мап ацәыркит. Туапсе ақалақь амҩақәа реиҭашьақәыргылара ахьцо мзызс иҟаҵаны. Амашьынақәа рыла ашәыр ахыузымышьҭуа иахҟьаны Новороссискҟа ицо апарон ала ирышьҭуеит. Ас еиҧш иҟоу амзызқәа хымҧада, ашәыри атранспорти рыхәқәа еизнарҳаит. Убри азы ауп, Урыстәылатәи аусбарҭақәа Аҧснытәи ацитрус аахәара мап зацәыркуа.

 

Аҧсны ақытанхамҩа аминистр Беслан Џьопуа иажәақәа рыла, иҿыхтәыз 29 нызықь тонна ацитрустә шәырқәа рахьынтәи 10 нызықь тонна роуп иҿыху.

 

Гал араион Мхәынџьиа ақыҭан иҟоу аҳәынҭқарратә ацитрустә нхамҩа Аиааира адиректор Џьамбул Кәартаа излеиҳәаз ала, ацитрустә шәырқәа есышықәса 500 тонна еизыргон. Сынтәа иҿыхны ишьҭоуп 100 тоннак, даҽа 500 тонна раҟара аҵла иаҿаз ашәыр зегьы ҧхасҭахеит.

 

20.01.2012 Аҧсныпресс

 

 Леонид Лакербаиа адезинфекциеи, адизинсекциеи, адератизациеи азҵаарақәа ирызкны аилатәара мҩаҧигеит

 

Аҧсны аҧыза-министр Леонид Лакербаиа адезинфекциеи, адизинсекциеи, адератизациеи азҵаарақәа ирызкны аилатәара мҩаҧигеит. Аилатәара иалахәын агәабзиарахьчара аминистр Зураб Маршьан, ареспублика асанитартә ҳақьым хада Владимир Берулаа, адезинфекциеи, адизинсекциеи, адератизациеи рзы Ареспубликатә аунитартә наплакы анапхгаҩы Џьанико Дочиа, араионқәеи ақалақьқәеи рхадара ахаҭыҧуаҩцәа.

 

Иазгәаҭатәуп, адезинфекциеи, адизинсекциеи, адератизациеи рзы аунитартә наплакы шаҧҵаз иҳаҩсыз ашықәс апрель мзазы.

 

Агәабзиарахьчара аминистр Зураб Маршьан еизаз ирзеиҭеиҳәеит анаплакы ахырхарҭа хадақәа. Насгьы иҳәеит уи аҧҵара зхымҧадатәихаз. Иара иажәақәа рыла, анаплакы абзоурала, аинфекциатә чымазарақәа рцәырҵра еиҵахоит. Зураб Маршьан дазааҭгылеит адизинфекциатә маҭәахәқәа Ҧсоу аҳәаа ахыгараан апроблемақәа шцәырҵуа.

 

Аҧыза-министр агәабазиарахьчара аминистр идиҵеит асанитартә-епидемиологиатә маҵзуреи адезинфекциеи, адизинсекциеи, адератизациеи рзы Ареспубликатә аунитартә наплаки рыбжьара аусеицуразы аимадра аҧҵара дацхраарц.

 

20.01.2012 Аҧсныпресс

 

 Гагратәи аурыс школ аиҭашьақәыргыларазы Краснодартәи атәылаҿацә ахадара иазоунажьит 462 млн. мааҭ

 

Аҧсны Ахада Александр Анқәаби Краснодартәи атәылаҿацә агубернатор Александр Ткачиови иаҭааит В.И.Попков ихьӡ зху Гагратәи аҩбатәи абжьаратә школ. Ари ашкол еиҭашьақәыргылоуп Александр Ткачиов иҟаиҵаз афинанстә ацхыраарала.

 

Арҵаҩцәеи аҵаҩцәеи рыхьӡала Ткачиов афотоальбом Аҧсны ҳамҭас ирҭеит. Ашкол Апрезидент, 11 тәи акласс аҵаҩы Инал Цымцба Александр Ткачиов иҭабуп ҳәа иеиҳәеит, уи аиҭашьақәыргыларазы. Ашкол иҭоуп 462 ҩык аҵаҩцәа.

 

Ашкол адиректор Изабелла Ажьиба асасцәа идлырбеит аибашьра амузеи, акомпиутертә классқәа, акрыфарҭа, аспортзал, арҵаҩцәеи аҵаҩцәеи руадақәа. Анаҩыс, Александр Анқәаби Александр Ткачиови ашкол арҵаҩцәа ирҧылеит. Дара азҵаауан ҿыц еиҭашьақәыргылоу ашкол аҟны аусура шцо атәы.

 

Аҵыхәҭәан, Александр Ткачиов арҵаҩцәа Ашықәс ҿыц рыдиныҳәалеит. Ирзеҕьаишьеит агәабзиара, ақәҿиарақәа имариам арҵаҩы иус аҟны.

 

Ашкол ахыбра ргылан 1904 шықәса рзы. Уи аиҭашьақәыргыларазы Краснодартәи атәылаҿацә ахадара иазоунажьит 462 млн. мааҭ.

 

Александр Ткачиов Гаграҟа иаара хықәкыс иаман Аҧсни Краснодари рыбжьара аусеицуразы амеморандум анапы аҵаҩра.

 

20.01.2012 Аҧсныпресс

 

 Иаҧҵоуп аҳәынҭқарратә комиссиа Султан Сосналиев диижьҭеи 70 шықәса аҵра иазкны агәаларшәаратә усмҩаҧгатәқәа рынагӡаразы

 

Аҧсны Аҳәынҭқарра Ахада Александр Анқәаб иусҧҟала иаҧҵоуп аҳәынҭқарратә комиссиа Аҧсны Афырхаҵа, ҧасатәи аҧыза-министр ихаҭыҧуаҩ, атәылахьчара аминистр , Ахьӡ-аҧша аорден I-тәи аҩаӡара акавалер, аинрал-леитенант Султан Сосналиев диижьҭеи 70 шықәса аҵра иазкны агәаларшәаратә усмҩаҧгатәқәа рынагӡаразы.

 

Аҧсны аҧыза-министр Леонид Лакербаиа анапхгара ззиуа аҳәынҭқарратә комиссиа иалоуп: атәылахьчара аминистр Мираб Кьышьмариа, Жәлар Реизара адепутат Зураб Аҩӡба, акультура аминистр Бадра Гәынба, Аҟәа ақалақь ахада Алиас Лабахәуа, аҧсуа ателерадиоеилахәыра ахантәаҩы Алхас Ҷолокәуа, атәыла ахада иабжьагаҩ Закан Нанба.

 

Аҳәынҭқарратә комиссиа иадуп ҳазну ашықәс Ажьырныҳәа 25 нӡа алагалақәа рыҟаҵара.

 

18.01.2012 Аҧсныпресс

 

 Ажьырныҳәа 19 рзы акәльтуратә хан Аҧсны имҩаҧгахоит апатриоттә мчрақәа реизара ду

 

Ажьырныҳәа 19 рзы акәльтуратә хан Аҧсны имҩаҧгахоит апатриоттә мчрақәа реизара ду. Аизара хықәкыс иамоуп апартиақәа зегьы еидызкыло Аҧсны апатриоттә мчрақәа реидгыла ҿыц аҧҵара.

 

Амшхәаҧштә аҟны ицәыргахоит ҩ-зҵаарак: атәыла ауаажәларратә-политикатә ҭагылазаашьеи аидгыла ҿыц аҧҟаҧҵәеи ралацәажәара.

 

17.01.2012 Аҧсныпресс

 

 Аҧснытәи аделегациа Сириа иҟоуп

 

Ажьырныҳәа 15 рзы Аҧснытәи аделегациа Сириаҟа амҩа иқәлеит. Атәыла аҭагылазаашьа аҭҵаареи, уаҟа инхо ҳџьынџьуаа рыҟазаашьа ахәшьара аҭареи рзы.

 

Аделегациа ахадара азиуеит арепатриациазы аҳәынҭқарратә еилакы ахантәаҩы Зураб Адлеиба.

 

Аҧснытәи аделегациа Сириа иҟазаауеит Ажьырныҳәа 20 нӡа.

 

17.01.2012 Аҧсныпресс

 

 Наҭела Ломиа дҟаҵоуп Аҧсны Аҳәынҭқарра адукатцәа рпалата аквалификациатә комиссиа аҟны атәыла ахада ихаҭарнакыс

 

Наҭела Ломиа дҟаҵоуп Аҧсны Аҳәынҭқарра адукатцәа рпалата аквалификациатә комиссиа аҟны атәыла ахада ихаҭарнакыс. Убри азы аусҧҟа инапы аҵеиҩит иахьа, Ажьырныҳәа 13 рзы Аҧсны Ахада Александр Анқәаб.

 

13.01.2012 Аҧсныпресс

 

 Давид Сангәулиа дҟаҵоуп Аҧсны Аҳәынҭқарра аӡбаҩцәа рквалификациатә коллегиа аҟны анагӡаратә мчра ахаҭарнакыс

 

Давид Сангәулиа дҟаҵоуп Аҧсны Аҳәынҭқарра аӡбаҩцәа рквалификациатә коллегиа аҟны анагӡаратә мчра ахаҭарнакыс. Убри азы аусҧҟа инапы аҵеиҩит иахьа, Ажьырныҳәа 13 рзы Аҧсны Ахада Александр Анқәаб.

 

13.01.2012 Аҧсныпресс

 

 А. Чичба ихьӡ зхәу Аҟәатәи аҳәынҭқарратә амузыкатә ҵараиурҭа астудентцәа рхы аладырхәуеит Ҳара ҳаеҵәақәа зыхьӡу актәи жәларбжьаратәи афестиваль-конкәрс

 

А. Чичба ихьӡ зхәу Аҟәатәи аҳәынҭқарратә амузыкатә ҵараиурҭа астудентцәа рхы аладырхәуеит Ҳара ҳаеҵәақәа зыхьӡу актәи жәларбжьаратәи афестиваль-конкәрс. Аконкәрс мҩаҧгахоит ақалақь Таллин, Ажьырныҳәа 15 рзы. Убри атәы иҳәеит Аҧсны акәльтура аминистр Бадра Гәынба.

 

Аконкәрс хықәкыс иамоуп еиуеиҧшым ажәларқәа рыбжьара аиҩызаратә еимадара арҕәҕәара. Уи иалахәхоит Аҧсны, Даҕьсҭан, Аермантәыла уҳәа рҟынтәи аҟазаратә коллективқәа.

 

12.01.2012 Аҧсныпресс

 

 Зураб Маршьан дҟаҵоуп аминистрцәа Реилазаара Аппарат анапхгаҩы ихаҭыҧуаҩс

 

Аҧсны аҧыза-министр Леонид Лакербаиа идҵаҟаҵарала Зураб Маршьан деиҭаҟаҵоуп аминистрцәа Реилазаара Аппарат анапхгаҩы ихаҭыҧуаҩс.

 

10.01.2012 Аҧсныпресс

 

 Лариса Қапба дҟаҵоуп аҵара аминистр ихаҭыҧуаҩс

 

Аҧсны Аҳәынҭқарра аминистрцәа Реилазаара адҵаҟаҵарала Лариса Қапба дҟаҵоуп аҵара аминистр ихаҭыҧуаҩс.

 

10.01.2012 Аҧсныпресс

 

 Иракли Хьинҭба дҟаҵоуп адәныҟатәи аусқәа рминистр актәи ихаҭыҧуаҩс

 

Аҧсны Аҳәынҭқарра аминистрцәа Реилазаара адҵаҟаҵарала Иракли Хьинҭба дҟаҵоуп адәныҟатәи аусқәа рминистр актәи ихаҭыҧуаҩс.

 

10.01.2012 Аҧсныпресс

 

 Аҧсны акәльтура аминистр Хьыбла Гьерзмаа лымш иира лыдиныҳәалеит

 

Аҧсны акәльтура аминистр Бадра Гәынба Аҧсны жәлар рартистка, Урыстәыла зҽаҧсазтәыз артистка Хьыбла Гьерзмаа лымш иира лыдиныҳәалеит.

 

Ҳаҭыр ду зқәу Хьыбла, гәыкала ишәыдысныҳәалоит шәымш иира! Шәҟазара лашеи ҧсы зхоу шәыбжьы хааи аршанхоит адунеи ахәаҧшҩцәа зегьы. Шәара асценаҿы шәцәырҵра - ҳара, шәџьынџьуаа ҳзы ныҳәоуп, - ҳәа аҳәоит адныҳәалараҿы.

 

Акәльтура аминистр Хьыбла Гьерзмаа илзеҕьаишьеит агәабзиара, агәамч, ақәҿиара дууқәа.

 

06.01.2012 Аҧсныпресс

 

 Иҟаҵоуп Аҧсны атәылахьчара аминистр ихаҭыҧуаҩцәа

 

Аҧсны Аҳәынҭқарра Ахада Александр Анқәаб иусҧҟала иҟаҵоуп атәылахьчара аминистр ихаҭыҧуаҩцәа.

 

Аинрал-маиор Владимир Васильченко дҟаҵоуп Аҧсны Аҳәынҭқарра арбџьармчқәа аштаб хада аиҳабыс, аинрал-маиор Беслан Ҵәыџьба дҟаҵоуп атәылахьчара аминистр ихаҭыҧуаҩс, Нодар Ҧилиа - астатс- маӡаныҟәгаҩс, атәылахьчара министр ихаҭыҧуаҩс. Аслан Анқәаб атехникала аиқәыршәаразы аусбарҭа аиҳабыс, атәылахьчара министр.

 

05.01.2012 Аҧсныпресс

 

 Аҧсны Ахада Алықьсандр З. Анқәаб Аҧсны ажәлар ирыдыиныҳәалеит Ашықәс Ҿыц