AҦCУAA  PЫБЖbbI

                                   -------------------- Aҧcнынтәи aжәабжь ҿыцқәа--------------------                 Аҧсуа шрифт



 

 Иазгәаҭоуп Аҧсны аҳәынҭқарра Ахада С.Багаҧшь Никарагәуеи Венасуелеи рахь иофициалтә визит

 

Ҧхынгәымза аҩбатәи азыбжазы имҩаҧысуеит Аҧсны аҳәынҭқарра Ахада Сергеи Багаҧшь Ареспубликақәа Никарагәуеи Венасуелеи рахь иофициалтә визит. Абри атәы иҳәеит Аҳәынҭқарра Ахада апартиа “Иакыу Аҧсны” актив рҧылараан.

 

Сергеи Багаҧшь иажәақәа рыла, иазгәаҭоуп арҭ атәылақәа рнапхгаҩцәа рыҟны аиқәшаҳаҭра хадақәа жәпакы рнапаҵаҩра. Аҳәынҭқарра Ахада иныҟәараан дымҩаҧыргоит Аҧсны аиҳабыра алахәцәа гәыҧҩык.

 

30.06.2010  Аофициалтә Саит Аҧсны Аҳәынҭқарра Ахада

 

 Аҧсны Амиграциатә маҵзура ашәҟәы иҭанагалоит аусуцәа мигрантцәа

 

Аҧсны амиграциатә маҵзура ашәҟәы иҭанагалоит Аҟәеи уи акәша-мыкәшеи аргыларатә обиектқәа рыҟны аус зуа аусуцәа мигрантцәа, - иҳәеит Амиграциатә маҵзура аиҳабы, аинрал Владимир Аршба.

 

2009 шықәса, жьҭаарамзазы, Аҧсны аҳәынҭқарра Ахада Сергеи Багаҧшь Иусҧҟала иаҧҵан Амиграциатә маҵзура.

 

Аршба иазгәеиҭеит,иара напхгара зиҭо аструктура ашьақәгылара астадиаҟны ишыҟоу. “Ҳара макьаназ, амигрантцәа ашәҟәы иҭаҳгалоит, аха иҳазрыҭом ақәиҭтәратә докәментқәа, апардламент “Ареспублика Аҧсны иҟоу аҳәаанырцәтәи атәылауаа рзы” азакәан аҵыхәтәантәи аҧхьараҟны ирыдыркылаанӡа.

 

Аршба ишьақәирҕәҕәеит, амаҵзура адырранҵақәа рзы абаза аҧҵара нап шанаркыз. Иара иажәақәа рыла, иахьа Аҧсны аус руеит Прибалтика, Молдова, Узбектистан, Таџьикистан, Туркмениа рҟынтә аусуцәа.

 

Аргыларатә обиектқәа ирҭаауа амиграциатә маҵзура аусуцәа, аҳәаанырцәтәи аусуцәа идеилдыркаауеит Аҧсны атерриториаҟны рыҟазаареи русуреи азакәан ҧшра шаҭатәу.

 

25.06.2010  Аофициалтә Саит Аҧсны Аҳәынҭқарра Ахада

 

 Аҧсны аҳәаанырцәтәи апаспрртқәа рбланқәа актәи апартиа азырхиоуп Урыстәылатәи Гознак аҟны, иаарласынгьы ареспубликахь иаагахоит

 

Аҧсны аҳәаанырцәтәи апаспрртқәа рбланқәа актәи апартиа азырхиоуп Урыстәылатәи Гознак аҟны, иаарласынгьы ареспубликахь иаагахоит, - ҳәа адырра ҟаиҵеит Ареспублика Аҧсны Аҩныҵҟатәи Аусқәа рминистрра Апаспорттә-визатә маҵзура аиҳабы Валерии Малиа. Убри аан уи ишьақәимырҕәҕәеит шаҟа бланк азырхиоу.

 

Малиа иазгәеиҭеит, Апаспорттә-визатә маҵзура Ареспублика Аҧсны атәылауаҩра аҳәаанырцәтәи апаспортқәа рыҭаразы ишеиқәыршәоу. Аха, апаспортқәа рылҩаара алагаразы иаҭахыуп иҷыдоу акомпиутертә программа, уи аус адырулоит краснодарынтәи апрограммеиқәыршәаҩцәа.
 

Малиа дақәгәыҕуеит, апаспортқәа рыҭара хацыркхап ҳәа рашәарамза анҵәамҭазы.
 

“Ҳара ҳазыҧшуп аҳәаанырцәтәи апаспорт ҿыцқәа рыхкы ашьақәырҕәҕәарази, уи ахәҧсеи,ҿҳәарас иамои рзы Аминистрцәа Реилазаара иаднакыло аӡбара. Сгәы иаанагоит, аҩныҵҟатәи апаспорт ахәҧса аиҳа еиҳахарым ҳәа”, - иҳәеит агентра зыҿцәажәоз.
 

Апаспорттә-визатә маҵзура аиҳабы иажәақәа рыла, аҳәаанырцәтәи апаспортқәа зегь раҧхьа иргыланы ирыҭахоит аҧсуа студентцәа, урыстәылатәи иреиҳау аҵараиурҭақәа рыҟны аҵара зҵои, иара убас Урыстәылатәи Афедерациа ахәышәтәырҭақәа рахь ҽыхәышәтәра ицараны иҟои. Араионқәа руааҧсыра, аҳәааырцәтәи апаспортқәа роурц алшоит Апаспорттә-визатә маҵзура араионтә ҟәшақәа рыҟны.
 

Малиа ишьақәирҕәҕәеит, аҳәаанырцәтәи апаспортқәа роурц шрылшо, Ареспублика Аҧсны аҩныҵҟатәи атәылауаҩра апаспорт змоу.

 

24.06.2010  Аофициалтә Саит Аҧсны Аҳәынҭқарра Ахада

 

 Аҧсны аҳәынҭқарра Ахада С.Багаҧшь дидикылеит Аргентинантәи аусдкылаҩ Мартин Телеча

 

Сергеи Багаҧшь Мартин Телеча ҭабуп ҳәа иеиҳәеит Аҧсны дахьзҿлымҳауи, визитла арахь иаареи рзы. Аргентинантәи асас еиҭеиҳәеит, ареспублика қәыҧш ауадаҩрақәа дышрызҿлымҳау, насгьы Аҧсны даҩызаны ихы шиҧхьаӡо.

 

“Сара сгәы иаанагоит, ақыҭанхамҩа аусхк аҟны шәспециалистцәа Аргентина аҭаара аинтерес рзаҵалап ҳәа. Ҳара иҳамоуп ари аусхк аҟны иаҳҿышәҵааша”, - ҳәа азгәеиҭеит латиноамерикатәи аусдкылаҩ аҳәынҭқарра Ахада иҿцәажәараан.

 

Багаҧшь иҳәеит Аргентинеи, егьырҭ  Латинтәи Америкатәи атәылақәеи рыбжьара аимадарақәа рышьақәыргылара ишазыразу.

 

М.Телеча Латинтәи Америка иашьагәҭыу ажәларқәа ацхыраара рызҭо,  иҳәынҭқарратәым аиҿкаара “Виа-Коча” дахаҭарнакуып, иара убас Буенос-Аирес Амилаҭтә библиотека анапхгараҭра алахәцәа дыруаӡәкыуп.

 

17.06.2010  Аофициалтә Саит Аҧсны Аҳәынҭқарра Ахада

 

 Ауаҩы изинқәа рзы Ҭырқәтәылатәи Жәларбжьаратәи Ассоциациа азхиоуп жәларбжьаратәи аренаҟны Аҧсны апроблемақәа рылацәажәара

 

Иахьа Аҧсны аҳәынҭқарра Ахада ихаҭыҧуаҩ А.Анқәаб дырҧылеит ауаҩ изинқәа рзы Ҭырқтәылатәи Жәларбжьаратәи Ассоциациа ахаҭарнакцәа.
 

Ассоциациа ахантәаҩы Абдулла Букшур иҳәеит, рассоциациа ахаҭарнакрақәа шыҟоу адунеи 22 тәыла рыҟны. “Уи адагьы, ҳара аус рыцаҳуеит ауаҩ изинқәа рыхьчаразы жәларбжьаратәи аиҿкаарақәа жәпакы, - иҳәеит уи. Ҭырқтәыла иҟоу Кавказ ажәларқәа Рфедерациа активла аусура иабзоураны, ҳара ареспубликаҿы иҟоу аҭагылазаашьа бзианы иаҳдыруеит”.
 

А.Букшур иажәақәа рыла, Ассоциациа азхиоуп Аҧсны апозициеи, уи атәылауаа ирымоу ауадаҩрақәеи, хәҭакахьала Европатәи атәылақәа рахь рцара иадҳәалоу апроблемақәеи рцәыргара. “Жәларбжьаратәи аренаҟны арҭ апроблемақәа ҿыҕәҕәала иҳәалатәуп. Ҳара иахьынӡаҳалшо ҳҽазаҳшәоит урҭ рыӡбараҟны ацхыраара аҟаҵара. Ауаҩы изинқәа рзы Ассоциациа иаартны иалацәажәарц алшоит иаҳа иҵару апроблемақәа, ари аҩыза аҭагылазаашьа ахы иархәатәуп”, - инаҵшьны иазгәеиҭеит уи.
 

Абдулла Букшур иазгәеиҭеит, Ассоциациа ахаҭарнакра Аҧсны аартра хықәкыс ишрымоу.
 

“Ҳара Ҭырқәтәыла анапхгара ҭабуп ҳәа раҳҳәоит ҳтәылауаа ҧынгылада шәтәылахь анеира аҭагылазаашьа ахьрымоу азы”, - иҳәеит Аҳәынҭқарра Ахада ихаҭыҧуаҩ А.Анқәаб. Убасҵәҟьа ҳара иаҳҭахыуп егьырҭ атәылақәа рахьгьы ацара, аха Аҧсны атәылауаа Урыстәылатәи аҳәаанырцәтәи апаспортқәа шрымоугьы, уи аҩыза аҭагылазаашьа иалхәдоуп”.
 

А. Анқәаб еиҭеиҳәеит, иаарласны ареспубликаҟны рыҭара ишалаго  жәларбжьаратәи астандартқәа ирықәшәо, иахәҭоу ахьчара астепенқәа зегьы змоу , аҧсуа аҳәаанырцәтәи апаспортқәа. “Ҳара ҭыҧк аҟны ҳгылам, ҳара ҳаиҭаҿиоит, ибзиан иара убасгьы урҭ рыла Ҭырқтәыла, Сириа, Иорданиа, Германиа, Еиду Америкатәи Аштатқәа уҳәа убас егьырҭ аҳәынҭқаррақәа рахь ҳрылацозҭгьы”, - иҳәеит уи.
 

Ассоциациа ааҭарнакцәа азҿлымҳан Аҧсны ауааҧсыра рхыҧхьаӡара, амилаҭтә еилазаара, Гал араион аҟны аҭагылазаашьа, ахҵәацәа рыргьежьра азҵаара, Қырҭтәыла аҟны наҟ-наҟтәи иалшо аизыҟазаашьақәа рформат. Арҭ атемақәа зегьы рҭак ҟаиҵеит Аҧсны аҳәынҭқарра Ахада ихаҭыҧуаҩ А.Анқәаб.
 

“Аҧсныҟа игьежьит изыгьежьуаз зегьы. Иарбан ҳәынҭқарразаалак, ариаҟара ахҵәацәа амыргьежьыцт,”- иҳәеит уи.
 

Гал араион аҟны аҭагылазаашьа далацәажәо, аҳәынҭқарра Ахада ихаҭыҧуаҩ иазгәеиҭеит “аҳәынҭқарра иалшо зегьы шыҟанаҵо атәылауаа рыҧсҭазаара аиҕьтәразы, убрахь иналаҵаны галаагьы”, “Аха иҳәатәуп Қырҭтәыла амаҵзура ҷыдақәа рдиверсиа-террористтә актқәа араион аҟны аҭагылазаашьа шҵыршәаауа,” – иҳәеит Анқәаб. Иахьатәи аҭагылазаашьа, ҳәарада жәа-шықәса раҧхьа иҟаз иузадкылом, аха иахьагьы аҳазалхреи, азинхьчаратә усбарҭақәеи, аҭыҧантәи ахадареи русзуҩцәа шҭахац иҭахоит”.
 

Аҳәынҭқарра Ахада ихаҭыҧуаҩ асасцәа идеилиркааит 2010 шықәса мшаҧымзатәи адырранҵақәа рыла, амилаҭтә паспортқәа рыҭоуп 77 нызқьҩыуаак аҧсуаа, 33 нызқьҩыуаак аерманцәа, 18 нызқьҩыуаак аурысқәа, 13 нызқьҩыуаак ақырҭқәа, 8 нызқьҩыуаак егьырҭ амилаҭқәа рхаҭарнакцәа.
 

Анқәаб агәыҕра ааирҧшит хыҧхьаӡара рацәала Ҭырқтәыла,Сириа, Иорданиа егьырҭ атәылақәа рыҟны инхо аҧсуа диаспора ахаҭарнакцәа Рҭоурыхтә Ҧсадгьылахь иаҳа активла игьежьлап ҳәа.

 

11.06.2010  Аофициалтә Саит Аҧсны Аҳәынҭқарра Ахада

 

 Аҧсны аделегациа Женеватәи ацәажәарақәа изаамҭанутәи рраунд азы агәнамӡара рымоуп

 

Аиҿцәажәарақәа рыҟны Аҧсны аҳәынҭқарра Ахада ихаҭарнак ҷыда Виачеслав Чырыкба аҳәамҭа ҟаиҵеит, Кавказ ашәарҭадаразы Женеватәи аицәажәарақәа рыҟны Аҧсни Аахыҵ Уапҧстәылеи рыҟны амч ахамырхәара еиқәзыршәо адокәмент аус адулараҟны аганқәа даҽазныкгьы ишеиқәшаҳаҭымхаз. “Аицәажәарақәа рыҩ-гәыҧк рыҟны имҩаҧысуан иуадаҩны”. – иҳәеит Чырыкба.
 

Уи иазгәеиҭеит, “актәи агәыҧ аҟны ишалацәажәоз ашәарҭадара азҵаареи  амч ахамырхәаразы аиқәшаҳаҭра аус адулареи, аха ақырҭуа ган активла ари азҵаара ахы ацәнагеит, уи аҟны ацхыраара арҭеит Еиду Америкатәи Аштатқәеи, иара Женеватәи апроцесс ацхантәаҩцәагьы – Евроеидгылеи, ООН-и ОБСЕ-и”.
 

“Аҧсуа гангьы ауаҧс гангьы уи инадҳәаланы агәнамӡара аадырҧшит, избанзар аи аҩыза аиқәшаҳаҭра аус адулара, аиҿцәажәарақәа рыҟны ҳалахәхара иахықәкы хадоуп”, - иҳәеит Чырыкба.
 

Урҭ иҳадыргалоит уиаҟара ҵакы змам атекстқәа, ари атема знӡаскгьы иадҳәалам”, - иҳәеит уи.
 

Аҳәынҭқарра Ахада аиҿцәажәарақәа рыҟны ихаҭарнак ҷыда иҳәеит “Медведев-Саркози 2008 шықәсазтәи аиқәшаҳаҭраҟны ишалагалаз ахарҭәаарақәа амч ахамырхәара еиқәзыршәо аиуристтә хыдҵа агаразы адокәмент аус шадулатәу”.
 

Иара иажәақәа рыла, агәманитартә проблемақәеи ахҵәацәеи иахыгои рызҵаарақәа иахьрылацәажәоз аҩбатәи агәыҧ аҟынгьы аиҿцәажәарақәа мҩаҧысуан иуадаҩны,  уаҟагьы аусура аанкылан.
 

“Абас еиҧш аимак-аиҿакқәа ацны имҩаҧысит амш, уажәы Аахыҵ Уаҧстәыла ахаҭарнакцәеи ҳареи еилахәны иазҳархиоит ҷыдалатәи акоммиунике, уаҟа ҳара ҳазааҭгылоит аиҿцәажәарақәа рцашьа ҳшақәшаҳаҭым”, - иазгәеиҭеит уи.
 

Иаанагома ари анаҩстәи араунд ҟалаӡом ҳәа азҵаара аҭак ҟаҵо Чырыкба иазгәеиҭеит: “Аганқәа рпозициақәа шеицәыхароугьы, арҭ ацәажәарақәа реиҿкааҩцәа адокәмент хада- амч ахамырхәаразы аиқәшаҳаҭра аус адуларазы аҧынгылақәа шыҟарҵогьы, макьаназы акы аҳәара уадаҩуп”.
 

“Ари азҵаара ӡбахоит ацажәарақәа рыцхантәаҩцәа (Евроеидгылеи, ООН-и ОБСЕ-и ) алархәны, дук хара имгакәа урҭ Қарҭи, Аҟәеи Цхинвали ирҭаауеит”, - иҳәеит Чырыкба.
 

Убри аан уи иациҵеит “Женеватәи ацәажәарақәа акризис аҟны инеины ишыҟоу”.
 

Аимак ашьҭахьтәи азҵаарақәа рҭышәныртәаларазы Аахыҵ Уаҧстәыла аҳәынҭқарра ахада ихаҭарнак ҷыда Борис Чочиев аҳәамҭа ҟаиҵахьан “аицәажәарақәа рыҟны излацәажәо азҵаара хада – амч ахамырхәароуп. Аха ишдыру еиҧш, ақырҭуа гани уи иадызцәылои иаартны ргәаапнагара рҳәо иалагеит, Медведев-Саркози реиқәшаҳаҭра инақәыршәаны, ари апроект аус адулара ахәҭаны иҳаҧхьаӡом ҳәа. Саакашвили ирежим ахаҭарнакцәа дрыдгылеит Еиду Америкатәи Аштатқәа рҳәынҭқарратә маӡаныҟәгаҩ Филипп Гордон”.
 

Иара иажәақәа рыла, еиду Америкатәи Аштатқәа рхаҭарнак игәаанагара акритика азыруит Аахыҵ Уаҧстәылеи, АҧсниУрыстәылеи рхаҭарнакцәа.

 

“Аҧсни Аахыҵ Уаҧстәылеи ргәаанагара ҳасаб ахьазырымуаз инадҳәаланы, ҳделегациақәа азал аанрыжьит”, - азгәеиҭеит уи.

 

09.06.2010  Аофициалтә Саит Аҧсны Аҳәынҭқарра Ахада

 

 Ҭырқәтәыла инхо аҧсуа диаспора ахаҭарнакцәа гәахәара дула ирыдыркылеит Владимир Путин Ҭырқтәылаҟа инеира

 

Аҧсны Аҩызаразы Аилак Ҭырқтәыла иҟоу Урыстәыла Афедерациа ацҳаражәҳәаҩ Владимир Ивановскии иахь ашәҟәы дәықәнаҵеит Урыстәыла Афедерациа аҧыза-министр Владимир Путин визитла Стамбул инеира инадҳәаланы.
 

Ҭырқтәыла инхо аҧсуа диаспора ахаҭарнакцәа гәахәарыла ирыдыркылеит Урыстәыла Афедерациа аҧыза-министр Ҭырқтәыла визитла иреира.
 

Аҧсны Аҩызаразы Аилак Урыстәыла аҧыза-министр Владимир Путин гәкала иҭабуп ҳәа иарҳәоит Аҧсни аҧсуа жәлари рахь иааирҧшуа агәцаракрази,иара убас Аҧсны ахьыҧшымра азхаҵараҿы уи инаигӡаз ароли рзы.
 

Аҧсуа диаспора Урыстәылеи Аҧсни рыбжьара агәлеимабзиаратә еизыҟазаашьақәа рыҿиара иацклаҧшуеит.
 

Ашәҟәы аҟны иазгәаҭоуп, адиаспора гәахәарыла ишрыдыркылаз Аҧсни Урыстәылеи рыбжьара ареспублика аҳәынҭҳәаақәа рыхьаразы ирыбжьарҵаз аиқәшаҳаҭреи, иара убас Урыстәыла Афедерациа Аҧсны аекономика аҿиараҟны иҟанаҵо ацхыраареи.
 

Аҧсны Аҩызаразы Аилак, аибашьра аамҭақәа рзы Ҭырқтәыла инхо аҧсуаа Аҧсни рыбжьара ицҳаны иҟалеит, уи еиқәнаршәон аинформациа еиҭныҧсахлара, аофициалтә структурақәа русура ҳәаақәнаҵон. Аилак иахьагьы активла аусура иацнаҵоит”, - аҳәоит ашәҟәы аҟны.
 

Аҧсны Аҩызаразы Аилак ҷыдала хырҩаа азыҟанаҵоит. Урыстәыла аҧыза-министр В.Путин Аҧсны Қырҭтәыла аилазаарахь агьежьра актуалра шацәыӡыз, аҵыхәтәантәи ашықәсқәа рзы ишьақәгылаз аҭагылазаашьақәа ирыхҟьаны ҳәа иҟаиҵаз аҳәамҭа.
 

“Ҳара апатын Владимир Путин гәык-ҧсыкала ҭабуп ҳәа иаҳҳәоит, арахь иаарагьы ҳаигәырҕьан иҳадаҳкылоит”, - ҳәа аҳәоит ашәҟәы аҟны.
 

Аҧсны Аҩызаразы Аилак ахьӡала ашәҟәы инапы аҵаиҩит уи ахантәаҩы Аргән Ирфан.

 

08.06.2010  Аофициалтә Саит Аҧсны Аҳәынҭқарра Ахада

 

 Аҧсны Адәныҟатәи аусқәа рминистрра агәҭынчымра аанарҧшуеит Гал араион аҟны атеррористтә актқәа рҽахьдырҿыцыз инамаданы

 

Аҧсны Адәныҟатәи аусқәа рминистрра агәҭынчымра аанарҧшуеит Гал араион аҟны Қырҭтәылантә иаауа атеррористтә актқәа рҽахьдырҿыцыз инамаданы.
 

Рашәарамза 1 азы Гал араион аҟны ақәларақәа ирыхҟьаны дшьын Аҧсны аҳәынҭқарратә ҳазалхратә еилакы аусзуҩ, рашәарамза 3 рзы атеррористцәа рнапаҟынтә дшьын Гал араион Реҧ ақыҭа ахада Дмитрии Кациа.
 

“Араҟа гәҩбара ыҟам, хыхь еиқәҧхьаӡоу ацәгьоурақәа Қырҭтәыла амаҵзура ҷыдақәа ишеиҿыркааз азы, арҭ атеррористтә актқәа еиҭадырҿыцит Гал араион аҟны аҭагылазаашьа ашьақәҟьара хықәкыс иҟаҵаны,” – ҳәа азгәаҭоуп Аҧсны адәныҟатәи аусқәа рминистрра аҳәамҭаҟны. Агәнамӡара узнарҵысуеит абас еиҧш иҟоу афакт – Қырҭтәыла ацәгьоурақәа мҩаҧнагоит жәларбжьаратәи аилазаарақәа, хәҭакахьала Евроеидгыла анаҧшратә миссиа еиҧш иҟоу аҳәаа иаҧну аҭыҧ аҟны ианыҟоу аамҭазы”.
 

Аҧсны Адәныҟатәи аусқәа рминистрра Женеватәи апроцесс алахәцәа зегьы рахь дҵаҟаҵараны иқәнаргылоит “Қырҭтәыла ахымҩаҧгашьа иақәнагоу ахәшьара арҭаразы, амч ахамырхәаразы аиқәшаҳаҭра анапаҵаҩра мап ахьацәнакуеи иара убас арегион аҟны аҭынчреи аҭышәныртәалареи ашәара иахьҭадыргылои рзы”.
 

Ареспублика Аҧсны адәныҟатәи аусқәа рминистрра Евроеидгыла анаҧшратә миссиа ахаҭарнакцәа рахь ааҧхьара ҟанаҵоит “Ҭакҧықәрала иазнеиларц рнапы иану адҵақәа рынагӡареи, иара убас иақәнагоу аусмҩаҧгатәқәа рыдыркыларазы аимак аҭыҧ аҟны апровокациақәа рымҩаҧгара аанкыларазы”.

 

07.06.2010  Аофициалтә Саит Аҧсны Аҳәынҭқарра Ахада

 

 Ҳазҭоу ашықәс азы ареспублика амчрақәа 18-20 рҟынӡа атроллеибус ҿыцқәа раахәара рыгәҭакыуп

 

“Ҳара шәара шә-Троллеибустә усбарҭа аус ацаҳуеижьҭеи акрааҵуеит. Аҟәа ахархәара змоу атехника абжеиҳара ҳара ҳҭыжьымҭақәа роуп. Ҳара аус ҳуеит ауаажәларратә афымцалашаратә ақалақьтә транспорт ашьақәыргылара ахырхарҭала, уажәы иҳамоуп атехника амодель ҿыцқәа, иаҳа ихаҭәаау, ҳаамҭа иақәшәо”, - иҳәеит Иаркыу акционертә еилазаара “ Тролза” анагӡаратә диреқтор Михаил Петриченко Аҳәынҭқарра Ахада ихаҭыҧуаҩ Алеқсандр Анқәаб иҧылара ашьҭахь.
 

Аҳәынҭқарра Ахада ихаҭыҧуаҩ иҧылараҟны ирылацәажәан ашықәс ҿыц азы атехника ҿыц аахәара аҭагылазаашьақәа. “Сара агәра ганы сыҟоуп, Аҟәа ауааҧсыреи асасцәеи рзы иҳамҭа бзиахап ҳәа. Ауаа ақалақь аҟны иныҟәаларц рылшоит ҳаамҭа иақәшо атранспорт ҿыц ала. Уи Аҟәа акәльтура аҿиараҟны лагала шьахәхоит”, - иазгәеиҭеит уи
 

Ф-шықәса раҧхьа ақалақь Енгьельсынтә Аҟәаҟа иааган атроллеибусқәа. 2004 шықәса рзы иаахәан 7 троллеибуск. “Урҭ ҳәара аҭахыума жәытә ҭыжьрақәан. Амашьына ҿыцқәа рыхә иаҳа ицәгьоуп. Ҳара ибзианы еилаҳкаауеит ареспублика афинанстә ҭагылазаашьа шымариам. Убри инадҳәаланы, ҳара аҧсуа ган азы ҳахәқәа иаҳа илаҳарҟәуеит”,- ишьақәирҕәҕәеит Петриченко.
 

Иаркыу акционертә еилазаара “Тролза” аремонт зҭахыу атехниказы ацхыраара ҟанаҵарц алшома ҳәа, акорреспондент изҵаара аҭак ҟаҵо анагӡаратә диреқтор иҳәеит: “Урҭ ес-ҽны ирҿыцлатәуп, рхархәара иазыҧҵәаз аҿҳәарақәа зегьы нҵәахьеит, убри азын ашәҟәы ианыхлатәуп”.
 

Петриченко иажәақәа рыла, Аҟәа иҟоу бжь-троллеибускаремонт рызуызарц алшоит.
 

“Атехника ҿыц ес-ҽны атехникатә маҵзура аҧҟарақәа ирыцклаҧшлазар, 5-6 шықәса рҟынӡа ахархәара ауеит. Анаҩс, атехника аҭагылазаашьа гәаҭаны ирҽеилатәуп”, - иазгәеиҭеит уи.

 

01.06.2010  Аофициалтә Саит Аҧсны Аҳәынҭқарра Ахада